Amakipe yombi yakinaga umukino w’umunsi wa 22 wa Shampiyona y’u Rwanda, kuri iki Cyumweru tariki ya 26 Gashyantare 2023. Witabiriwe na benshi barimo n’Umuyobozi w’Icyubahiro wa APR FC, Gen James Kabarebe.

Umukino watangiye amakipe yombi yinjira mu mukino hakiri kare, APR FC ibona uburyo bwa mbere bwo gushaka igitego mu mukino ku mupira watewe na Fitina Ombalenga, ariko Harerimana Obed awukuraho.

Ni umukino wakiniwe hagati mu kibuga ku mpande zombi, habaho kugera imbere y’izamu cyane nubwo nta kipe yigeze ibonamo amahirwe, mu minota yaranzwe n’ishyaka ryinshi.

Namanda Wafula na we yabonye umupira imbere y’izamu wenyine ku munota wa 10, abafana ba Musanze FC bose bari babaze igitego, ariko ananirwa kuwushyira mu izamu.

Ku munota wa 25, APR FC na yo yaremye uburyo bwa mbere bukomeye ku mupira watewe na Nshuti Innocent, ukubita igiti cy’izamu, ikipe yose ihita igira icyizere cyo kubona ibitego.

Ibyishimo by’abafana ba APR FC ku munota wa 35 byavuye kuri coup-franc yatewe neza na Ishimwe Christian, abakinnyi ba Musanze bananirwa kuwukuraho neza, Mugisha Gilbert ashyiramo igitego cya mbere.

Nyuma y’iminota ine gusa, Nsengiyumva Ir’shad yakorewe ikosa, Ishimwe Christian yongera gutera indi Coup-franc, ashyira ku mutwe wa Mugisha Gilbert washyizemo igitego cya kabiri ku munota wa 39.

Iki gitego cyazamuye icyizere cy’abakinnyi ba APR FC bakomeza gusatira izamu, ariko na Musanze ntabwo yigeze icika intege. Yakomeje gusatira kugeza no ku minota ibiri yongerewe ku gice cya mbere, gusa igitego gikomeza kubura. Iki gice cyarangiye APR FC iri imbere ku bitego 2-0.

Icya kabiri nacyo cyatangiye ikipe y’Ingabo z’igihugu iyoboye umukino, kuko yahise inabona ikindi gitego ku munota wa 47, cyatsinzwe na Bizimana Yannick.

Nyuma y’iki gitego, abafana ba Musanze FC batangiye kwinubira imikinire y’umunyezamu wabo Ntaribi Steven, watsinzwe ibitego byose mu ruhande rumwe.

Mu minota ishyira 60, APR FC yatangiye gukinira inyuma, yafata imipira ikayohereza imbere cyane kwa Nshuti Innocent wari wasigaye asatira wenyine. Musanze nayo muri iyo minota yakiniraga mu kibuga cya APR FC, byafashaga Peter Agbrevol kugera imbere y’izamu cyane.

Ku munota wa 53, umutoza wa APR FC yakoze impinduka akura mu kibuga Niyibizi Ramadhan, ashyiramo Ruboneka Jean Bosco. Izi mpinduka zayifashije kugabanya imipira yakinirwaga mu kibuga cyayo.

Nyuma y’izi mpinduka kandi, amakipe yombi yakiniye umupira hagati mu kibuga. APR FC yongeye ikura mu kibuga Rwabuhihi Aimé Placide asimburwa na Bizimana Yannick ku munota wa 82.

Umukino wongeweho iminota ine ku minota 90 y’umukino, APR FC ihita ishyira Nizeyimana Djuma mu kibuga asimbura Nshuti Innocent, Mugisha Gilbert yongera kugerageza ubundi buryo ku mupira ukomeye Nduwayo Valerie yakuyeho. Iki nicyo gikorwa cyasoje umukino APR FC iyoboye ku bitego 3-0.

Musanze iri ku mwanya wa 12 n’amanota 26. Uyu wabaye umukino wa cyenda itabona amanota atatu, ndetse ku mukino ukurikira izakirwa na Gasogi United FC.

Indi mikino yabaye kuri uyu munsi ni Marine FC yatsinze Espoir FC ibitego 4-0, Police FC itsinda Sunrise 2-1, Mukura VS itsinda Gasogi United FC iyitsinda 2-1.

Kugeza ubu urutonde rwa Shampiyona y’u Rwanda ruyobowe na APR FC ifite amanota 46, ikurikiwe na Rayon Sports ifite 45, Kiyovu Sports ifite 44 ku mwanya wa Gatatu.

Mugisha Gilbert ufasha abasatira izamu yafunguye amazamu ku munota wa 36 w'umukino

Byari ibyishimo ku basore ba APR FC bahize igitego iminota 36 yose

Bafashijwe kwishima na Team Manager wa APR FC, Maj Uwanyirimpuhwe Jean Paul

Igitego cya mbere cyateye akanyabugabo APR FC ishaka n'ibindi

Mugisha Gilbert yagiye kwishimana n'Umutoza wungirije Umunya-Tunisia, Jamel Eddine Neffati,

Yahise amuterura amushyira mu bicu

Umujyanama wa Perezida wa Repubulika mu by'Umutekano, General James Kabarebe (hagati); Chairman wa APR FC, Lt Gen Mubarakh Muganga (ibumoso) na Perezida wa Musanze FC, Tuyishimire Placide 'Trump'

Umunyamakuru w'imikino na politiki kuri RBA, Eddy Sabiti yari yaje kureba uyu mukino

Abafana n'abakunzi ba APR FC bari bashimishijwe n'igitego cya mbere

Ingabo z'u Rwanda zari zaje gushyigikira APR FC ku bwinshi

Nyuma y'igitego cya mbere bamwe mu bafana ba APR FC bacyishimiye batera 'pompages'

Igice cya mbere kirangiye abafana ba APR FC baririmbye mu kwishimira uko Ikipe yabo yayoboye umukino

Bakoze akarasisi bazenguruka stade babyina banaririmba indirimbo zirata ubutwari bw'Ikipe y'Ingabo z'Igihugu

Bari bitwaje ibirango n'ibikoresho bivuza amajwi aranguruye

Uyu yari yitwaje amafoto y'abakinnyi b'ikipe yihebeye

APR FC yabanje guhusha uburyo bwinshi mbere yo gutsinda igitego cya gatatu

Rutahizamu Bizimana Yannick yaboneye APR FC igitego cya gatatu ku munota wa 49

Ntiyasobanukirwaga ibyari biri kumubaho

Bizimana yagiye kwishimana n'abafana

Bagenzi be bamusanze imbere y'abafana bari bafite ubwuzu bamufasha kwishima

Umutoza wungirije wa Musanze FC, Ibrahim Abdulla yashenguwe no gutsindwa na APR FC

Hari aho abakinnyi b'amakipe yombi batabyumvaga kimwe

Rutahizamu wa APR FC, Bizimana Yannick agerageza bumwe mu buryo ariko butatanze umusaruro

Abafana ba Musanze FC bari bifashe mapfubyi nyuma y'uko Ikipe yabo yinjijwe ibitego 3-0

Umutoza wungirije wa Musanze FC, Ibrahim Abdulla afashe urupapuro ruriho igishushanyo cy'uburyo bw'imikinire bwari gutsinda APR FC

Umutoza mukuru wa Musanze FC, Adel Ahmed aganira n'umwungiriza we Ibrahim Abdulla uburyo bakwishyura ibitego 3-0 APR FC yari imaze kwinjiza mu izamu ryabo

Rutahizamu wa Musanze FC, Peter Agblevor ahanganye na ba myugariro ba APR FC

Rutahizamu wa APR FC, Nshuti Innocent ahanganiye umupira na Nduwayo Valeur wa Musanze FC ukina hagati mu kibuga

Mugisha Gilbert wa APR FC agerageza gutera umupira asagariwe na Nduwayo Valeur na Ben Ocen ba Musanze FC

Abakinnyi ba Musanze FC bari bababaye nyuma yo kwinjizwa ibitego bitatu ku busa

Iminota ine ni yo yongerewe kuri 90 isanzwe y'umukino

Umunyezamu Ntaribi Steven yashenguwe n'agahinda nyuma yo kwinjizwa ibitego bitatu

Bamwe mu bafana ba Rayon Sports bari baje kuri Stade Ubworoherane gushyigikira Musanze FC ngo ibatsindire umukeba APR FC atabakura ku mwanya wa mbere

Mugisha Gilbert ukina hagati ha APR FC yashimiye Imana nyuma yo kurangiza umukino ari muzima akanatahukana amanota atatu

Abatoza ba Musanze FC bakiri bashya bashenguwe n'agahinda nyuma yo gutsindwa na APR FC ibitego 3-0

Nyuma y'umukino Umutoza wa Musanze FC, Adel Ahmed yakomeje kwicara ku ntebe wenyine yashenguwe n'agahinda

Amafoto: Ntare Julius