Ibi byateye impungenge nyinshi abafana ba Gikundiro, bakeka ko bashobora gutakaza uyu myugariro wazamuye urwego rwe ndetse akaba ari n’imwe mu nkingi za mwamba muri iyi kipe, nyuma y’uko uwari Kapiteni wayo, Manzi Thierry asezerewe n’ubuyobozi bwayo.

Ibi byatumye abafana ba Rayon Sports basanga nta wundi myugariro bashingiraho wayobora bagenzi be uretse Mutsinzi Ange.

Uyu musore yabanje mu kibuga mu mukino wa ¼ cy’Igikombe cy’amahoro batsinzemo Gicumbi FC ibitego 7-1 kuri Stade ya Kigali kuri uyu wa Kane,. Mutsinzi akaba yawukinnye iminota 90 ndetse anitwara neza.

Nyuma y’uyu mukino bamwe mu bafana bari basigaye mu gice cyo hepfo kidatwikiriye cya Stade ya Kigali, bakaba bamuhamagaye maze bamuririmbira indirimbo bagira bati ‘’Wigenda turacyagukeneye’’ bakomeza bamubwira ko ntacyo azababurana ariko ntabatere agahinda ngo abasige.

Uyu musore akaba yababwiye ko agihari ndetse azanagumana na Rayon Sports aho yagize ati: ‘’ Ntimugire impungenge, ndacyahari. Ndi umukinnyi wa Rayon Sports, nimuhumure.’’

Nyuma yo kumva aya magambo bahise batera hejuru bashimira uyu musore ko abahumurije, bamubwira ko bazamuguma inyuma mu gihe cyose azaba akiri muri Rayon Sports.

Nyuma yo gutsinda Gicumbi FC ibitego 7-1 mu mukino ubanza aya makipe yombi akaba azahura mu mukino wo kwishyura ku itariki ya 23 kuri Stade ya Gicumbi.

Bamuhamagaye maze bamugenera ubutumwa ko bifuza ko aguma muri Gikundiro

Bateye indirimbo bagira bati ’'Wigenda turacyagukeneye’’

Hashize akanya abateze amatwi bamubwira ko bazamuguma inyuma igihe cyose azaba akiri muri Rayon Sports

Ku murongo w'uruzitiro rw'ikibuga cya Stade ya Kigali abafana bari bahahagaze bose bamusabaga ko yagumana nabo

Yabasubije abamara impungenge ko akiri umukinnyi wa Rayon Sports

Yakoze ku mutima nk'ikimenyetso cyo kubabwira ko agikunda Rayon Sports

Nyuma y'iki kimenyetso bamwenyuye nawe ababwira ko akiri kumwe na bo

Uko yajyaga mu rwambariro bamukurikizaga ubutumwa bwuzuye amagambo arata ibigwi bye

Abandi bafataga amashusho

Amafoto: Ntare Julius