Ku wa 20 Kamena 2021 nibwo uyu myugariro yari yateye ivi hasi asaba umukunzi we ko yazamubera umugore w’isezerano. Ni ibirori byari byabereye muri The Manor Hotel iherereye i Nyarutarama ndetse biba hubahirijwe ingamba zo kwirinda Covid-19.

Ku wa 22 Kamena 2021 nibwo Muvandimwe na Umwari basezeraniye mu Murenge wa Nyakanda mu Karere ka Nyarugenge, ko biyemeje kuzabana mu buryo bwemewe n’amategeko nk’umugore n’umugabo.

Uyu myugariro yemereye IGIHE ko indi mihango irimo gusezerana imbere y’Imana no kwakira inshuti n’abavandimwe, izaba ubwo icyorezo cya Covid-19 kizaba gicishije make.

Ubushize ubwo twaganiraga, Muvandimwe yavuze ko we na Umwari bamaze imyaka igera ku munani bakundana.

Ni umusore nawe uri mu mpera z’amasezerano ye muri Police FC amazemo imyaka igera kuri itandatu. Gusa nyuma yo kongera amasezerano arimo gusoza, yagowe n’ibibazo by’imvune byaje no kumuviramo gutakaza umwanya ubanzamo.

Babiherewe icyangombwa kigaragaza ko barahiriye kuzabana nk'umugore n'umugabo

Muvandimwe na Umwari bemeranyije ko bagiye kubana nk'umugore n'umugabo

Yanabisinyiye

Muvandimwe JMV yarahiriye ko yemeye ko Umwari amubera umugore mu buryo bwemewe n'amategeko

Muvandimwe ataravunika yabanzagamo muri Police FC