Kuri uyu wa Gatandatu, tariki ya 9 Gicurasi 2026, ni bwo hagaragajwe umwanzuro ku kibazo cy’uyu wari umukozi wa Gorilla FC ku myitwarire yagaragaye mbere y’umukino ubanza wa 1/2 cy’Igikombe cy’Amahoro wahuje ikipe ye na Rayon Sports.

FERWAFA yavuze ko Ndatimana yagize imyitwarire mibi kandi inyuranyije n’amategeko agenga imyitwarire n’imyifatire mbonezabupfura, ari na yo mpamvu yafatiwe ibihano.

Yagize iti “Iyo myitwarire yatumye ahagarikwa mu bikorwa byose bifitanye isano n’umupira w’amaguru mu gihe cy’amezi 12, anacibwa ihazabu y’ibihumbi 500 Frw agomba kwishyurwa bitarenze iminsi 90.”

Ndatimana yahawe igihe ntarengwa cyo kujuririra iki cyemezo kingana n’iminsi itatu uhereye ku munsi yakimenyesherejweho.

Mu mukino w’lgikombe cy’Amahoro wahuje Gorilla FC na Rayon Sports FC ku wa 22 Mata 2026 ukarangira ari igitego 1-1, Gorilla FC ni yo yageze mu kibuga mbere itangira gutegura aho abakinnyi bayo baza kwishyuhiriza.

Ndatimana wari ufite ibikoresho byo kwifashisha, yahise agenda akura ibintu mu mufuka abinyanyagiza mu kibuga, ndetse mu byari bibigize harimo n’amasaka.

Benshi mu babibonye babihuje n’imyemerere ikunze kugaragara mu mupira w’amaguru mu Rwanda n’ahandi ku Isi, izwi nk’amarozi.

View this post on Instagram

A post shared by Rwanda FA (@ferwafa)

Ndatimana Olivier yari asanzwe ashinzwe ibikoresho muri Gorilla FC

Ndatimana Olivier yahagaritswe mu bikorwa byose bya ruhago mu gihe cy'umwaka

Ibyo Ndatimana Olivier yamenaga mu kibuga harimo n'ibisa n'amasaka

Ndatimana Olivier yagaragaye amena ibintu bitazwi

Amafoto: Umwari Sandrine