Aba kapiteni batangajwe kuri uyu wa Gatanu, tariki ya 17 Werurwe 2023, mu gikorwa cyabereye muri Kaminuza ya Kepler. Cyitabiriwe n'abanyeshuri bayigamo, abo muri UNILAK, RICA na Kaminuza ya Kigali.

Hari mbere y'ibiganiro bahawe n'abanyabigwi bagera ku icyenda babaganirije ku rugendo rwabo rwo kubaka izina, inama ku myitwarire iganisha ku gutsinda.

Abakapiteni umunani ni bo bazaba bayoboye amakipe azaba agizwe n’abakinnyi 150 bazava ku migabane itandukanye.

Aba ni Umufaransa Robert Pires, Umunya-Cameroun, Patrick M’Boma, Umunyarwanda Jimmy Gatete, Umunya-Brésil Maicon Douglas, Umunya-Misiri Wael Kamel Gomaa El Hawty, Umuyapani Tsuneyasu Miyamoto, Umunya-Espagne, Gaizka Mendieta n’Umunya-Canada, Charmaine Elizabeth Hooper.

Buri mukapiteni ni we uzahitamo abakinnyi bazaba bagize ikipe ye hashingiwe ku bo bakinanye, inshuti ze cyangwa abo basangiye igihugu n’agace akomokamo.

Iki gikorwa cyateguwe nka kimwe mu bikomeye byaherekeje Inteko Rusange ya FIFA yateraniye i Kigali ku wa 16 Werurwe 2023, ndetse ikaze kwemerezwamo Gianni Infantino nka perezida w’iri shyirahamwe mu 2023-2027.

Igikombe cy’Isi cy’Abakanyujijeho muri ruhago ku Isi [Veteran Clubs World Championship-VCWC] n’ibikorwa biyishamikiyeho biteganyijwe kubera ku butaka bw’u Rwanda ku wa 10-20 Gicurasi 2024.

Umuvugizi Mukuru wa VCWC, Régis Isheja, yasobanuye ko iki gikombe cy’Isi ari ubwa mbere kigiye kuba.

Ati “Ni amateka. Ni ubwa mbere bigiye kuba ko iki Gikombe cy’Isi cy'abakanyujijeho gikinwa. Umwaka utaha tuzaba dufite amakipe umunani, azaturuka mu bice umunani.’’

Afurika izaba ifite amakipe atatu [West and Central Africa, East and South Africa, North Africa and Middle East], u Burayi bufite abiri [North and West Europe, East and South Europe], Amerika abiri [South America na North America]. Aziyongeraho ayo muri Aziya na Oceania.

Muri ba kapiteni batangajwe, Jimmy Gatete azaba ayoboye abanyabigwi bo mu Majyepfo no Hagati ya Afurika.

Siewe Fred uyobora Ishyirahamwe ry'Imikino y'Abakanyujijeho ku Isi (FIFVE) yashimye abanyeshuri batandukanye barimo abo muri Kaminuza ya Kepler, aba Kaminuza ya Kigali na UNIILAK bitabiriye iki gikorwa.

Yashimye abanyabigwi bumvise ko bikwiye ko bitaba umuhamagaro we wo gutegura urubuga ruhuza abakanyujijeho muri ruhago.

Umunya-Cameroun Geremi Sorele Njitap Fotso yashimye abatekereje uyu mushinga kuko ari umwanya mwiza wo gusangizanya ubunararibonye.

Yavuze ku rugendo rwo kuba umukinnyi w’ikirangirire muri ruhago yinjiyemo akiri muto.

Mu Mpanuro yatanze, yavuze ko nta nzira ya bugufi yageza abafite ibyifuzo byo kuba abakomeye atari ugutegura.

Ati “Nta buryo buryo binyuramo bitari ugushyira imbaraga mu byo ukora no gutegura.’’

Tariki ya 12-14 Ukwakira 2022 abakinnyi bakanyujijeho muri ruhago bageze mu Mujyi wa Kigali, ahatangirijwe ibikorwa byo kumenyekanisha VCWC byiswe “Legends in Rwanda”.

Icyo gihe hahuriye Umunyarwanda Jimmy Gatete; Abanya-Cameroun, Roger Milla na Patrick Mboma; Umunya-Sénégal Khalilou Fadiga; Umunya-Ghana Anthony Baffoe n’Abafaransa Lilian Thuram na Laura Georges.

Iki gikorwa cyakurikiwe n’icyabereye muri Qatar mu mpera za 2022, cyegukanywe na Argentine itsinze u Bufaransa kuri penaliti.

Igikombe cy’Isi cy’Abakanyujijeho muri ruhago ni cyo gikorwa cya siporo cyagutse mu bihuza abatagikina. Cyitezwemo abarenga 150 bazahurira mu makipe umunani azakina imikino 20.

Ni irushanwa ritazashingira mu kibuga gusa ahubwo rizinjiriza n’igihugu binyuze mu bucuruzi n’ubukerarugendo.

Muri VCWC hanateguwe inama zitandukanye, ibikorwa by’imyidagaduro birimo kumurika imideli, ibitaramo, amamurikagurisha n’ibindi bizitabirwa n’abarenga 5000.

Amafoto: Igirubuntu Darcy

Video: Mucyo Jean Regis