Ni Shampiyona ihagaze amakipe amaze gukina imikino itanu ndetse abakunzi bayo bamaze kubona ishusho ya menshi mu makipe ari kuyikina.

Ni iki se twamaze kumenya muri iyi mikino itanu ibanza?

Arsenal ishobora gutsindwa

Ikipe ya Arsenal yatwaye igikombe cya Premier League giheruka, yari yatangiye uyu mwaka w’imikino isa n’idakumirwa mu byumweru bya mbere.

Gutsinda Brighton ku wa Gatandatu byari gutuma iyi kipe y’i Londres igira intsinzi umunani zikurikirana mu mikino yose, bikaba byari kuba ari amateka mashya angana n’ayo yigeze gukora.

Ariko ibyo byose byarangiriye ku ntsinzwi ya 3-0 yatsindiwe kuri Stade ya Amex ku wa Gatandatu.

Arsenal yari imaze igihe idatsindwa umukino wa shampiyona ku kinyuranyo kirenze igitego kimwe, tutavuze gutsindwa ibitego bitatu, kuva mu Ukwakira 2024.

Ni bwo bwa mbere yari itsinzwe bikabije muri shampiyona kuva muri Gicurasi 2023 ubwo yatsindwaga ibitego 3-0 n’iyi kipe yari ihanganye na yo.

Umutoza Mikel Arteta yagize ati “Ibi ntabwo bizakuraho ibyo ikipe yakoze ndetse n’ibyo abakinnyi bakoze mu byumweru bitandatu cyangwa birindwi bishize kuva bavuye mu Gikombe cy’Isi.”

Yakomeje ati “Ibyo twakoze, uburyo twahanganye ndetse n’umubare w’imikino twatsinze byari ibintu bidasanzwe, ariko iki ni isomo rikomeye kuri twese kugira ngo twumve icyo bisaba kugira ngo utsinde ku rwego nk’uru.”

Brighton yagaragaje ko na Arsenal ishobora gutsindwa

Maresca yatangiye neza muri Man City

Hari benshi bibazaga niba Manchester City yari kuzagira ibibazo nyuma yo gutandukana n’umutoza Pep Guardiola wari umaze imyaka 10 ayitoza.

Ibintu ntibyatangiye neza kuri Enzo Maresca, nyuma yo gutsindwa na Arsenal mu mukino wa Community Shield.

Ariko kuva icyo gihe, Manchester City yatsinze imikino yayo yose itanu ya Premier League ndetse inagira intsinzi zirindwi zikurikirana mu mikino yose nyuma yo gutsinda Sunderland ibitego 5-3 ku Cyumweru.

Ibyo byatumye City irusha Arsenal amanota atatu.

Maresca yagize ati “Mu kiganiro n’abanyamakuru mbere y’umukino, navuze ko nari niteze umukino ukomeye cyane. Nyuma twinjijwe ibitego bibiri cyangwa bitatu, ariko twize byinshi muri ibi byumweru umunani kandi ni ibintu byiza.”

Enzo Maresca na Manchester City bakomeje kwitwara neza

Brighton na Brentford zikomeje gutungurana

Brighton na Brentford, amakipe abiri atarigeze atwara igikombe gikomeye, akomeje gutungura benshi muri uyu mwaka w’imikino.

Brighton ya Fabian Hurzeler yishimiye intsinzi yayo y’ibitego 3-0 kuri Arsenal, bituma iba iya gatatu ku rutonde rwa shampiyona, irushwa na Arsenal iri imbere yayo amanota abiri gusa.

Brighton imaze imyaka itatu itsindira ku kibuga cyayo amakipe yatwaye igikombe cya Premier League umwaka wabanje.

Umukinnyi ukomeye w’iyi kipe, Pascal Gross, yasetse agira ati “Oya” ubwo BBC yamubazaga niba Albion iri mu makipe ahatanira igikombe.

Hagati aho, ikipe ya Keith Andrews, Brentford, iri munsi ya Brighton ku rutonde n’ikinyuranyo cy’inota rimwe gusa.

Abantu benshi bumvaga ko iyi kipe izagira ibibazo nyuma yo gutandukana na Thomas Frank mu mpeshyi ishize, ariko ahubwo ibintu byabaye byiza ku bwa Andrews wari umutoza wihariye ku mipira y’imiterekano muri iyi kipe.

Intangiriro yabo muri uyu mwaka w’imikino, aho bataratsindwa nyuma y’imikino itanu kandi bari ku mwanya wa kane, irerekana ko Andrews atari umutoza w’igihe gito.

Binjiye mu kiruhuko cy’imikino y’amakipe y’ibihugu nyuma y’umusaruro ukomeye kurusha iyindi, ari wo gutsinda Chelsea ibitego 3-0.

Leeds na yo ikomeje gutungurana ku bw’umutoza Daniel Farke, na yo ifite amanota icyenda ndetse iri mu mwanya ushobora kuyigeza muri Champions League.

Liverpool ya Andoni Iraola na Everton ziri inyuma yayo n’ikinyuranyo cy’ibitego.

Brentford iheruka kunyagira Chelsea ibitego 3-0

Carrick yaba ari ku gitutu?

Nyuma y’imyaka irindwi, Manchester United yongeye gukora ikintu kimwe inshuro ebyiri yizeye ko kizayiha umusaruro utandukanye: Guha akazi uwigeze kuyibera umukinnyi waherukaga gutoza mu Cyiciro cya Kabiri mu Bwongereza, nyuma yo gutangira neza nk’umutoza w’agateganyo.

Mu 2019 yari Ole Gunnar Solskjaer, ubu ni Michael Carrick.

Nubwo Carrick yagize igihe gihagije cyo gutegura ikipe ye mu mpeshyi, kuri ubu Manchester United imaze gutsinda umukino umwe gusa wa shampiyona.

Amanota atanu ifite nyuma y’imikino itanu ya shampiyona ni yo make cyane inganya n’ayo yagize muri iki gihe mu mateka yayo muri Premier League.

Yinjiye mu kiruhuko cy’imikino y’amakipe y’ibihugu nyuma yo kunganya na Fulham igitego 1-1, ndetse byabaye ngombwa ko irokorwa n’igitego cya Matheus Cunha mu minota ya nyuma.

Manchester United na Michael Carrick ntibatangiye neza muri Premier League

Amakipe yazamutse ntiyoroshye

Mu 2024 na 2025, amakipe atatu yazamutse muri Premier League yahise asubira mu cyiciro cya kabiri, kandi menshi muri yo yari afite amanota make cyane.

Ariko uwo murongo warangiye umwaka ushize ubwo Sunderland yasozaga ku mwanya wa karindwi ikabona itike yo gukina amarushanwa y’i Burayi, naho Leeds ikarangiza ku mwanya wa 14. Burnley ni yo yonyine yasubiye mu cyiciro cya kabiri.

Ibyumweru bya mbere by’uyu mwaka w’imikino birerekana ko dushobora kongera kubona ibintu bisa n’ibyo.

Hull City iri ku mwanya wa munani nyuma y’imikino itanu, aho gutsindwa na Newcastle ibitego 2-1 ari bwo bwa mbere yari itakaje umukino muri uyu mwaka.

Ipswich iri ku mwanya wa 11 mu gihe Coventry yo, nyuma yo gutsindwa imikino ine ibanza idatsinze igitego na kimwe, yatsinze Nottingham Forest igitego 1-0 kandi iri mu myanya yo kumanuka gusa kubera ikinyuranyo cy’ibitego.

Hull City yazamutse uyu mwaka, kuri ubu ni iya munani

Nta gisubizo cyihuse kuri Tottenham

Tottenham yasoreje ku mwanya wa 17 mu myaka ibiri ishize, imyanya yayo ibiri mibi kuva ubwo yamanukaga mu cyiciro cya kabiri mu 1977-78.

Icyizere cyari cyiyongereye nyuma y’uko ishoye akayabo mu mpeshyi, aho yakoresheje miliyoni 302 z’Amapawundi ndetse ikongeramo n’abakinnyi babiri bakomeye yatijwe.

Ubwugarizi n’abakinnyi bo hagati ni byo byahinduwe cyane, hiyongeramo n’abakinnyi bashya bo ku mpande.

Gusa iyi kipe yasigaranye rutahizamu umwe mukuru gusa, Dominic Solanke, umaze gutsinda ibitego 12 gusa muri Premier League mu myaka irenga ibiri amaze muri iyi kipe.

Gutsindwa na Aston Villa ibitego 3-2 ku wa Gatandatu byatumye Tottenham ijya ku mwanya wa 19 mbere y’ikiruhuko, nubwo yari imaze gutsinda ibitego byayo bibiri bya mbere muri shampiyona.

Tottenham ifite amanota abiri gusa mu mikino itanu imaze gukina ndetse ibitego bibiri ifite yabyinjijwe itsindwa na Aston Villa 3-2 mu mpera z'icyumweru gishize

Chelsea itanga ibirori ku bayireba

Mbere y’uko Premier League itangira, abantu benshi bari bafite amatsiko yo kureba icyo Xabi Alonso azakora muri Chelsea muri uyu mwaka w’imikino.

Uyu Munya-Espagne yafashije Bayer Leverkusen gutwara ibikombe bibiri mu Budage idatsinzwe na rimwe mu mwaka w’imikino wa 2023-24.

Chelsea yakoze impinduka nyinshi mu ikipe yayo muri iyi mpeshyi, aho yaguze umukinnyi wo hagati usatira Morgan Rogers kuri miliyoni 117 z’Amapawundi ndetse inagura umunyezamu wa mbere Emiliano Martinez, bombi bavuye muri Aston Villa.

Mu mikino itanu iyi kipe imaze gukina, habonetsemo ibitego 22 ariko ibyinshi ni ibyo yinjijwe (12) kandi iri ku mwanya wa 10.

Muri ibyo bitego byose ntihabarirwamo intsinzi yayo y’ibitego 6-3 yabonye kuri Leeds muri Carabao Cup.

Muri make, Chelsea ni ikipe itanga umunezero ku batari abafana bayo, ariko ku bafana bayo cyangwa abayobozi bayo bishobora kuba bitameze neza.

Imikino ya Chelsea ibonekamo ibitego byinshi, ariko byinshi muri byo bijya mu izamu ryayo