Raheem Sterling muri Manchester City

Ku nshuro ebyiri muri Kamena, Liverpool yanze amafaranga Manchester City yatangaga kugeza ubwo bumvikanye ko bazabanza kwishyura miliyoni £ 44 andi bayongereho bitewe n’uko uyu musore w’imyaka 20 yitwaye.

Kugeza ubu Sterling niwe mukinnyi uhenze w’Umwongereza (Angleterre), uwa kabiri uhenze ukomoka mu birwa by’u Bwongereza (Royaume-Uni).

Sterling azambara numero 7 yambarwaga na James Milner wagiye muri Liverpool, yari afite amasezerano azarangira mu 2017 azajya ahembwa ibihumbi £180 mu gihe yafata ibihumbi 100.

Uyu musore wari mu ikipe y’u Bwongereza y’abatarengeje imyaka 17 yatsinze u Rwanda mu gikombe cy’Isi cyabereye muri Mexique yari yaguzwe ibihumbi 600 £ avuye muri QPR.

Umutoza wa Manchester City, Manuel Pellegrini yavuze ko bishimiye kwakira umwe muri ba rutahizamu beza Isi ifite.

Yagize ati “ Ni umukinnyi mwiza kandi ukiri muto, ndizera ko abafana ba Manchester City bazamwishimira.”

Mu mikino 92 yakiniye Liverpool, Raheem Starling yatsinze ibitego 18.

{Abakinnyi bahenze b’Abongereza}

Gareth Bale – Tottenham muri Real Madrid, 2013 – miliyoni £85.3

Raheem Sterling – Liverpool muri Manchester City, 2015- miliyoni £49

Andy Carroll – Newcastle muri Liverpool, 2011- miliyoni £35

Rio Ferdinand – Leeds muri Manchester United, 2002- miliyoni £30

Luke Shaw – Southampton muri Manchester United, 2015- miliyoni £27

Wayne Rooney – Everton muri Manchester United, 2004- miliyoni £27

James Milner – Aston Villa muri Manchester City, 2010- miliyoni £26

Robin Van Persie muri Fenerbahce

Nyuma y’imyaka itatu yari amaze Old Traffold avuye muri Arsenal, Robin Van Persie yasinye imyaka ibiri muri Fenerbahce yo muri Turukiya yakiriwe n’abafana ibihumbi 10 abasezeranya kuzakoresha imbaraga zose ngo abahe ibyishimo.

Van Persie yasobanuye ko kuba yavuye muri Manchester United ari ibintu bibaho mu buzima, ko ari ibisanzwe mu mupira w’amaguru, yemeza ko mbere yo kujya muri Turukiya yasezeye abo bakinaga ahamya ko yahagiriye ibihe byiza.

Nyuma yo kuva muri Arsenal mu 2012 aguzwe miliyoni £ 26, Van Persie yatsindiye Manchester United ibitego 58 mu mikino 105.

Muri Fenerbahce, Van Persie asanzemo Nani nawe wakinnye muri Manchester United waguzwe miliyoni £4.25. Azajya ahembwa ibihumbi £240.