Ni umukino w’umunsi wa 20 wa Shampiyona y’umupira w’amaguru mu Rwanda, wabereye kuri Stade ya Kigali i Nyamirambo ku mugoroba wo ku wa 8 Werurwe 2019.

Uyu mukino Rayon Sports yawutangiye isatira ishaka intsinzi no kwisubiza umwanya wa mbere iherukaho ku munsi wa 19 wa shampiyona, ubwo yatsindaga Gicumbi FC 1-0 ariko iwumaraho amasaha macye kuko mukeba wayo APR FC yahise iwisubiza nyuma yo gutsinda Marines FC 2-0.

Uyu mukino waranzwe n’ishyaka ku mpande zombi, ku munota wa kabiri, Mugisha Gilbert wa Rayon Sports yateye ishoti rikomeye umupira ukurwamo n’umuzamu wa Bugesera FC, Nsabimana Jean de Dieu bakunze kwita Shaulin.

Rayon Sports yakomeje kotsa igitutu Bugesera FC. Ku munota wa gatatu, Iradukunda Eric bakunze kwita Radu yateye ishoti rikomeye ariko rifata ku giti cy’izamu, ku munota wa karindwi Rutanga nawe ahusha igitego cyari cyabazwe.

Rayon Sports yakomeje gusatira ariko amahirwe ntiyayisekera kuko ku munota wa 18, Bugesera FC yaje gutsinda igitego cyiza, cyatsinzwe na Nzigamasabo Steve ku mupira mwiza yari ahawe na Samson Irokan Ikecukwu.

Rayon Sports yakomeje kotsa igitutu izamu rya Bugesera FC, ihusha uburyo bwinshi bwashoboraga kuvamo ibitego. Nko ku munota 54, Jules Ulimwengu yahushije penaliti yahawe ku ikosa ryari rikorewe Raphael Da Silva mu rubuga rw’amahina.

Rayon Sports yakomeje kotsa igitutu Bugesera FC maze ku munota wa 77, rutahizamu Jules Ulimwengu ayishyurira igitego yatsindishije umutwe, ku mupira yari uhawe na Iradukunda Eric Radu, nyuma y’uko umunyezamu awufashe ntawukomeze.

Bugesera FC yongeye gushakisha igitego aho ku munota wa 81, Ahishakiye Jacques yahushije ikindi gitego cyari cyabazwe, ku mupira yateye ukagarurwa n’umutambiko w’izamu.

Mu minota ya nyuma, impande zombi zakomeje gushakisha ibitego ariko umukino urangira ari 1-1, bituma Rayon Sports iguma ku mwanya wa kabiri n’amanota 44 irushwa rimwe gusa na mukeba APR FC, mu gihe Bugesera iri ku mwanya wa 10 n’amanota 23.

Rayon Sports yari yakoze impinduka ebyiri mu bakinnyi 11 babanjemo hazamo Mugisha Gilbert na Mugheni Fabrice

Bugesera FC niyo yari yakiriye uyu mukino kuri Stade ya Kigali nyuma y'uko ikibuga cyayo gihagaritswe

Nzigamasabo Steve yafunguye amazamu ku munota wa 18 w'umukino ku mupira wari uhinduwe na Ikechukwu Samson

Mazimpaka Andre wari umaze imikino itandatu atinjizwa igitego, ntacyo yabashije gukora kuri uyu mupira w'umutwe

Nzigamasabo yishimira igitego

Umunyezamu Nsabimana Jean De Dieu 'Shaulin' wa Bugesera FC yishimira igitego cy'ikipe ye

Abakinnyi ba Rayon Sports bababajwe n'igitego batsinzwe mu gihe byari ibyishimo ku ruhande rwa Bugesera FC

Donkor Prosper wari ufite amakarita atatu y'umuhondo na Michael Sarpong wavunitse bareba ikipe yabo itsindwa

Umunyezamu wa Bugesera FC Nsabimana Jean De Dieu yagize amahirwe umupira watewe na Radu ugonga izamu

Jules Ulimwengu ntiyorohewe n'uyu mukino

Manishimwe Djabel yakoreweho amakosa menshi muri uyu mukino kugeza ubwo asimbuwe yavunitse

Nimubona Emery wa Bugesera FC ahanganiye umupira na Mugisha Gilbert

Umutoza wungirije wa Rayon Sports Wagner do Nascimento Silva yifashe mu mutwe ubwo bari batangiye igice cya kabiri bahusha ibitego

Ntabwo wari umunsi mwiza ku mutoza Robertinho

Manishimwe Djabel yavuyemo ku munota wa 53 yavunitse, asimburwa na Bukuru Christophe

Rayon Sports yahawe penaliti ku ikosa Nkusi Prince yakoreye kuri Raphael Da Silva

Jules Ulimwengu ntiyabashije kuyinjiza, ifatwa n'umunyezamu

Umunyezamu wa Bugesera FC Nsabimana Jean De Dieu yamwenyuraga nyuma yo gufata penaliti ya Ulimwengu

Robertinho ajya inama n'abatoza bamwungirije

Umutoza wa Bugesera FC Seninga Innocent atanga amabwiriza kuri myugariro w'ikipe ye

Bugesera FC yageragezaga gutinza iminota

Abafana ba Rayon Sports bari bahangayikishijwe n'uko ikipe yabo yahushaga ibitego byinshi

Rayon Sports yishyuye igitego ku munota wa 77 gitsinzwe na Jules Ulimwengu ku mupira wahinduwe na Iradukunda Eric Radu

Rayon Sports bishimiye iki gitego cyabafashije kubona inota rimwe

Abafana batangiye gusohoka ku munota wa 80

Djabel Manishimwe yavunikiye muri uyu mukino

Yagiye gushimira abafana ahambiriye

[email protected]

Amafoto: Ntare Julius