{Police FC yatsinze Rayon Sports ibitego 2-1 ibona itike y’umukino wa nyuma na AS Kigali mu irushanwa ryateguwe n’Urwego rw’Umuvunyi ugamije kurwanya ruswa.}

Rayon Sports yinjiye mu mukino nta ba myugariro Nizigiyimana Kharim na Sibomana Abuba bafite ibibazo byihariye, kapiteni Ndayisenga Fuad wavunitse biyongera ku mutoza Andy Mfutila watoje umukino umwe agasubira muri Repubulika Iharanira Demokarasi ya Congo.

Mbaraga Jimmy yatsindiye Police FC igitego ku munota wa 31, irusha Rayon Sports guhanahana no kugumana umupira muri ba myugariro bahuzagurikaga.

Rayon Sports yakinishaga Kanamugire Moses, Usengimana Faustin, Majyembere Alipe na Manzi Hubert muri ba myugariro.

Igice cya kabiri gitangiye, Rayon Sports yishyuye ku mupira watewe uvuye muri koroneri Usengimana Faustin aragombora mu gihe umutoza Casa Mbungo Andre yari asimbuje abakinnyi batatu batari bageze mu myanya yabo.

Abakinnyi ba Police FC binjiye mu kibuga barimo Habyarimana Innocent na Nshuti Idesbald bokeje igitutu Rayon Sports, Mbaraga Jimmy atera umupira ukubita umutambiko w’izamu usongwamo neza na Habyarimana ku munota wa 83.

Ku mukino wa nyuma, Police FC yatwaye iki gikombe mu 2013 itsinze Rayon Sports ibitego 2-1 izahura na AS Kigali kuri stade Amahoronyasezereye APR FC.

Ikipe izatwara igikombe izahabwa miliyoni 3 naho iya kabiri ihabwe miliyoni 2 Rwf.