Mu bakinnyi 11 umutoza Ivan Minnaert yakoresheje, yahinduye uburyo bw’imikinire yari asanzwe akoresha ba myugariro batatu ashyiramo bane naho hagati mu kibuga kubera ibibazo by’imvune ku bakinnyi nka Mugisha François Master na Niyonzima Olivier Sefu ndetse na Kwizera Pierrot utemerewe gukina kubera ikarita y’umutuku yabonye bahura na Costa do Sol, yakoresheje Ange Mutsinzi usanzwe ari myugariro akaza gufatanya na Yannick Mukunzi.

Muri uyu mukino w’ishiraniro, rutahizamu Hussein Tchabalala watsindiye Rayon Sports ibitego bine muri bitanu imaze gutsinda mu marushanwa Nyafurika uyu mwaka, arakina asatira ariko anyuze ku ruhande rw’iburyo mu gihe urw’ibumoso haraba hari Muhire Kevin afasha Ismaila Diarra na Christ Mbondi gushaka ibitego.

Rayon Sports isabwa kwitwara neza muri uyu mukino wa mbere w’amatsinda imbere y’abafana, iraba ifite akazi gakomeye ko guhagarika ba rutahizamu b’Amavubi Tuyisenge Jacques na Kagere Meddie mu gihe na kapiteni w’iyi kipe Haron Shakava aza gutanga akazi gakomeye mu bwugarizi.

Uyu mukino uratangira saa 18:00 kuri Stade ya Kigali kwinjira bikaba ari 2000 Frw ahasanzwe na 5000 Frw ahatwikiriye mu gihe 20000 Frw ari igiciro cyo myanya y’icyubahiro. Biteganyijwe ko imiryango ifungurwa saa 13:00 abafana bagatangira kwinjira mu rwego rwo kwirinda umubyigano.