Minisiteri ya Siporo n’Umuco ifatanyije n’inzego ziyishamikiyeho yateguye imikino itandukanye mu rwego rwo kwibuka abagize uruhare mu guteza imbere Siporo n’Umuco bishwe muri Jenoside yakorewe Abatutsi mu 1994. Rayon Sports yegukanye igikombe nyuma yo gutsinda La Jeunesse kuri Penaliti.

Mu mupira w’amaguru habayeho irushanwa ryahuje amakipe ane: Rayon Sports, Police FC, La Jeunesse na Mukura VS.

Imikino y’amajonjora yabaye ku wa 5 Kamena 2013. Rayon Sports yatsinze Mukura VS ibitego 2-1 na ho La Jeneusse ikuramo Police FC kuri Penaliti 4-2 nyuma y’uko igiohe gisanzwe cy’umukino cyari cyarangiye ari ubusa ku busa.

Kuri uyu wa Gatandatu tariki ya 8 Kamena 2013 ni bwo habaye umukino wa nyuma, aho Rayon Sports yegukanye igikombe itsinze La Jeunesse kuri Penaliti 3-1, nyuma y’uko igihe gisanzwe cy’umukino cyarangiye ari ubusa ku busa.

Muri uyu mwaka Rayon Sports ni igikombe cya gatatu itwaye, nyuma y’uko yari imaze imyaka icyenda nta gikombe ikozaho imitwe y’intoki.

Igihe cyo kwibuka cyahariwe ibyumweru bibiri, byatangijwe ku mugaragaro ku itariki ya 01 Kamena 2013 bikazasozwa tariki ya 15 Kamena 2013 kuri Petit Stade i Remera guhera saa kumi n’imwe z’umugoroba.