Iri rushanwa rigeze muri 1/8. Kuri uyu wa Kabiri no ku wa Gatatu rizakomeza yishakamo azakomeza muri ¼.
Kuri uyu wa kabiri ikipe ya Paris Saint-Germain irakira Real Madrid mu mukino ubanza.
Imibare itandukanye igaragaza ko Real Madrid imaze kwegukana igikombe cya UEFA Champions League inshuro 13 mu gihe Paris Saint- Germain nta na kimwe ifite.
PSG n’ubwo ari ikipe kuri ubu ihanzwe amaso n’Isi yose, kure hashoboka yageze muri Champions League ni ku mukino wa nyuma yatsindiwemo na Bayern Munich mu 2020.
Imikino 10 yo mu marushanwa y’i Burayi niyo imaze kubahuza hagati yabo.
Ikinyuranyo cy’intsinzi kirimo ntabwo ari kinini bitewe n’uko Real Madrid yatsinzemo imikino ine kuri itatu ya Paris Saint-Germain, mu gihe iyo amakipe yombi yanganyije ari itatu.
Zaherukaga guhurira mu matsinda ya UEFA Champions League mu 2019-20 ubwo PSG yatsindiraga mu rugo Real Madrid ibitego 3-0.
Mu mukino wo kwishyura bagabanye amanota ubwo habonekaga ibitego 2-2.
Paris Saint-Germain yatsinze imikino ibiri, inganya ibiri, itsindwa umwe mu mikino itanu iheruka kwakiramo Real Madrid i Parc des Princes.
Man City yaba igiye guhindura amateka imbere ya Sporting Lisbon?
Manchester City biteganyijwe ko yerekeza muri Portugal kwisobanura na Sporting Lisbon.
Imyaka 13 yari ishize Sporting Lisbon itazi uko imikino yo gukuranamo muri UEFA Champions League isa.
Mu 2012, Sporting Lisbon yatsindiye Manchester City muri 1/8 cya UEFA Europa League. Sporting Lisbon imaze gutsinda imikino irindwi mu icyenda iherutse gukina mu marashunwa y’i Burayi.
Manchester City imaze imyaka icyenda ikina mu cyiciro cy’amakipe 16 mu irushanwa rya UEFA Champions League.
Imikino 20 iheruka gukinirwa ku kibuga kitari icyayo, Manchester City imaze gutsindamo 13.
Bayern Munich irongera kwigaragaza?
Kuri uyu wa Gatatu, Bayern Munich irakina na Red Bull Salzburg nyuma yo gutsindwa ibitego 4-2 na Vfl Bochum muri Bundesliga.
Hagati ya Bayern Munich na Red Bull Salzburg, umukino uheruka kubahuza byarangiye Bayern Munich itsinze ibitego 3-1 kuri stade yayo ya Allianz Arena.
Ibitego bitandatu nibyo bimaze kuboneka mu mikino ibiri iherutse guhuza aya makipe. Red Bull Salzburg yarayitsinzwe yose.
Liverpool irakinira i San Siro
Kuri uyu wa Gatatu kandi Liverpool izakina na Inter Milan yo mu Butaliyani. Liverpool ifite umukoro ukomeye wo gutsindira Inter Milan ku kibuga cyayo.
Mu mukino wa shampiyona Liverpool iheruka, yatsinze Burnely igitego 1-0 ibifashijwemo na Fabinho.
Liverpool imaze guhura na Inter Milan inshuro eshanu mu marushanwa y’i Burayi. Ubwa nyuma baheruka mu mukino wa 1/8 ni mu 2008, umukino warangiye Liverpool itsinze.
Inter Milan iraza kujya muri uyu mukino, nyuma yo kunganya na Napoli igitego 1-1 muri Serie A.
Kuva mu 2008 kugeza mu 2010, Inter Milan yatsindiwe muri 1/8 cya UEFA Champions League n’amakipe atatu yo mu Bwongereza harimo na Liverpool. Iyi kipe yo mu Butaliyani imaze gutsindwa imikino itatu yonyine muri 30 yakiniye i San Siro.





Ibitekerezo 0