{Imikino 8 ikurikirana y’intsinzi kwa FC Barcelona yarangijwe no kunganya na Getafe i Madrid mu gihe Real Madrid yatsinze Almeria ibitego 4-1 ikomeza kongera umuhigo w’intsinzi 20 zikurikirana.}

Getafe 0-0 FC Barcelona

Getafe, ikipe ibarizwa mu mujyi wa Madrid yahagaritse intsinzi y’urukurikirane rw’imikino 8 ubwo bagwaga miswi na FC Barcelona yakinaga nta Neymar wagize imvune ku mukino wa champions league na Paris Saint Germain.

Lionel Messi na Luis Suarez bakinnye iminota 90, Barcelona inganya umukino wa kane mu mikino 15 ya shampiyona.

Pedro yasimbuye Neymar; Sergio Busquets, Xavi na Ivan Rakitic bakinnye hagati naho Dani Alves, Gerard Piqué, Jeremy Mathieu na Jordi Alba bugarira izamu rya Claudio Bravo.

Kuri uyu wa Kabiri bazakina na Huesca mu gikombe cy’umwami “Copa Del Rey” basoze 2014 bakina na Córdoba.

Real Madrid yatsinze umukino wa 20 ukurikirana

Nyuma yo kwesa umuhigo w’umukino wa 18 w’intsinzi zikurikirana Barcelona yari yashyizeho mu 2004-05, Real Madrid yatsinze umukino wa 20 ibitego 4-1 cya Almeria mbere yo kujya mu gikombe cy’Isi cy’amakipe kiri kubera muri Maroc

Ku munota wa 34, Isco yatsinze igitego cya mbere ku mupira yateye umunyezamu ahagaze nabi ananirwa kuwugarura, Garcia Rabasco yagomboye ku ishoti yatereye kure Casillas ahagaze nabi.

Mbere yo kujya kuruhuka, Gareth Bale wari wahushije uburyo bwinshi yatsinze igitego cya kabiri, umupira yahawe na Toni Kroos.

Almeria yashoboraga kugombora iki gitego ariko penaliti yatanzwe ku ikosa Marcelo yakoreye kuri Edgar, Verza ayiteye Casillas awukuramo.

Ronaldo wari wabuze muri uyu mukino yatsinze igitego ku munota wa 81 umupira yahawe na Karim Benzema mbere y’uko atsinda icya kabiri muri uyu mukino ahawe na Carvajal, igitego cya 25 muri shampiyona ku munsi wa 15.

Ku munsi wa 15 wa La Liga, Real Madrid ni iya mbere n’amanota 39 ikurikiwe na FC Barcelona ifite 34.