Umukino ubanza wahuje aya makipe kuri Estadio Santiago Bernabeu, Real Madrid yari yanyagiye Atletico Madrid zisangiye umujyi ibitego 3-0 byose byari byatsinzwe na Cristiano Ronaldo. Umukino wo kwishyura waraye uhuje aya makipe warangiye Atletico yegukanye intsinzi y’ibitego 2-1, itari ihagije kugira ngo ibashe kugera ku mukino wa nyuma uzabera i Cardiff ku itariki 3 Kamena.

Atletico yatangiye isatira cyane ndetse inabona ibitego bibiri mu minota 16 ya mbere ndetse benshi batangira gutekereza ko igiye kwishyura ibitego bitatu yatsinzwe mu mukino ubanza.

Igitego cya mbere cyatsinzwe na Saul Niguez ku mutwe yateye neza ku mupira wari uvuye kuri corner. Bidatinze ku munota wa 16, Atletico yahise ibona penaliti nyuma y’aho Rafael Varane yari amaze gutega Fernando Torres, maze Antoine Griezmann ayinjiza neza.

Real Madrid yahise ikanguka itangira gusatira ndetse ku munota wa 42 Isco atsinda igitego ku kazi gakomeye kari kamaze gukorwa na Karim Benzema. Iki gitego cyahise cyongerera akazi abakinnyi ba Atletico, dore ko basabwaga ibitego bitatu kugira ngo bakomeze. Bakomeje kugerageza uburyo bwo gutsinda igitego ariko biranga ndetse umukino urinda urangira ari ibitego 2-1, Atletico isezererwa ku bitego 4-2.

Real Madrid igeze ku mukino wa nyuma w’iri rushanwa kabiri yikurikiranya, isanzeyo Juventus yagezeyo isezereye AS Monaco ku bitego 4-1 mu mikino yombi.

Juventus yongeye guhura n’ikipe yo muri Espagne ku mukino wa nyuma w’iri rushanwa, nyuma y’uko mu 2015 yahahuriye na FC Barcelona itsindwa ibitego 3-1.