Robertinho yatoje Rayon Sports mu mwaka w’imikino wa 2018-2019 mbere yo gutoza Gor Mahia FC yo muri Kenya.

Vipers SC yatwaye igikombe cya shampiyona imaze gutsinda Express SC ibitego 3-0, mu mukino w’umunsi wa 26 wakinwe ku gicamunsi cy’uyu wa Gatanu.

Yunus ’The Hitman’ Sentamu yatsinze ibitego bibiri (25’, 34’), ikindi gitsindwa na Bright Anukani ku munota wa 60’.

Hilary Mukundane wa Vipers SC ni we wahawe igihembo cy’umukinnyi witwaye neza mu mukino muri rusange.

Abandi bakinnyi bafashije iyi kipe muri uyu mwaka barimo, Bobosi Byaruhanga, Ceasar Manzoki, Milton Kalisa, Paul Mucureezi, Paulo Willa, Ibrahim Orit n’abandi.

Express SC yanyagiwe ibitego bitatu ni yo yari ifite igikombe cya shampiyona iheruka ya 2020-2021.

Vipers SC itozwa na Robertinho yaherukaga igikombe cya shampiyona mu mwaka w’imikino 2019-2020, kuri ubu igize igikombe cya gatanu mu mateka yayo kuva yashingwa mu 1969.

Iyi kipe bita Impiri z’i Kitende yatwaye igikombe cya mbere cya shampiyona mu 2010. Yatwaye ikindi mu 2015, 2017-2018 na 2019-2020.

Vipers SC yatwaye igikombe habura imikino ine kugira ngo shampiyona irangire kuko irarusha KCCA FC amanota 14 mu gihe imikino isigaye iri ku manota 12.

KCCA FC yagize amanota 50 itsinze Soana FC ibitego 2-0 mu gihe Vipers SC yagiraga amanota 64.

Bivuze ngo n’iyo KCCA yazayitsinda yose, Vipers igatsindwa yose, ntacyo byahindura.

Express SC yari ifite igikombe giheruka ntabwo uyu mwaka wayibereye mwiza kuko mu mikino 27 ifite amanota 42.

Vipers SC ni yo izasohokera Uganda mu mikino Nyafurika ihuza amakipe yabaye aya mbere iwayo (TOTAL CAF Champions League) mu mwaka w’imikino 2022-2023.

Vipers SC ni ikipe ifite amikoro ku buryo sitade bakiniraho yemewe na CAF, ni na yo yakira imikino mpuzamahanga

Bobosi Byaruhanga ni umukinnyi w'umuhanga unashingirwaho muri Uganda Cranes

Robertinho yakoze amateka yo kuba umunya-Bresil wa mbere utwaye igikombe muri Uganda

Bobosi Byaruhanga ni umukinnyi w'umuhanga unashingirwaho muri Uganda Cranes

Vipers SC yafashe intebe imaze iminsi yicayemo KCCA FC na Express SC

Hilary Mukundane wabaye umukinnyi mwiza kurusha abandi yageze muri Vipers SC avuye muri Mbarara City yari abareye kapiteni