UEFA yatangaje ko aba bakinnyi batatu batoranyijwe mu bandi 35 n’abanyamakuru b’imikino bo mu bihugu 54 bigize iyi mpuzamashyirahamwe, mu ijonjora rya kabiri basize abakinnyi 10 bavuyemo Messi, Ronaldo na Suarez ku nshuro ya gatatu.
Ubwo hazaba hatomborwa uko amakipe azajya mu matsinda ya UEFA Champions League nibwo hazamenyekana uyu mukinnyi uba cyangwa agasimbura Cristiano Ronaldo wari wagitwaye mu 2014.
Uyu yari yabanjirijwe na Franck Ribéry wa Bayern Munich mu 2013, Andrés Iniesta wa FC Barcelona mu 2012 na Lionel Messi mu 2011 wagitwaye ku nshuro ya mbere.
Muri uyu mwaka, Lionel Messi yatsindiye FC Barcelona ibitego 58 mu mikino 57 atanga imipira 31 yavuyemo ibitego, yesheje umuhigo w’ibitego byinshi muri shampiyona, La Liga, wari ufitwe na Telmo Zarra, 251, ubwo yatsindaga ibitego bitatu bakina na Seville tariki ya 22 Ugushyingo.
Na FC Barcelona batwaye ibikombe bitatu, shampiyona, igikombe cy’umwami na UEFA Champions League.
Muri Champions League yatsinze ibitego 10 anganya na Ronaldo na Neymar agira ibitego 77 muri iri rushanwa anganya na Ronaldo.
Cristiano Ronaldo yabaye rutahizamu wa shampiyona ya Espagne n’ibitego 48 na 61 mu marushanwa yose n’imipira 22 yavuyemo ibitego [imikino 54] byatumye agwa mu ntege Alfredo Di Stéfano ku rutonde rwa ba rutahizamu b’ibihe byose ba Real Madrid.
Muri uyu mwaka nibwo mu mateka, Ronaldo yatsinze ibitego 61 mu mikino 54 atanga n’imipira 22 yavuyemo ibindi, yatsinze bitanu mu mukino umwe batsinda Granada ibitego 9-1 atsinda n’ibitego bitatu mu mukino umwe inshuri eshatu muri shampiyona.
Nyuma yo kuva mu Liverpool, Luis Suarez yatsinze ibitego 25 atanga n’imipira 24 yavuyemo ibindi mu mikino 43, uyu yari mu nyabutatu ya FC Barcelona yatsinze ibitego 122 mu mwaka ushize w’imikino.
Mu bakinnyi 35 bari batoranyijwe bitwaye neza i Burayi harimo Eden Hazard wa Chelsea na Alexis Sanchez wa Arsenal mu bakina shampiyona y’u Bwongereza.
TANGA IGITEKEREZO