Kuri uyu wa Gatandatu tariki 15 Mutarama 2018, Rayon Sports yakiriye AS Muhanga mu mukino wabaye iminsi itatu nyuma yo gutsindwa na APR FC.

Ibi byatumye uyu mukino wabereye kuri stade ya Kigali utitabirwa cyane n'abakunzi ba Rayon Sports bababajwe n'imyitwarire y'ikipe yabo mu mukino iheruka.

AS Muhanga yaje muri uyu mukino ishaka intsinzi yari gutuma ihita ijya imbere ya Rayon Sports.

Byatumye umutoza wayo Abdul Mbarushimana wahoze atoza Rayon Sports akoresha ba rutahizamu batatu; Habimana Yussuf, Ntirushwa Aimee na Yannick Bizimana.

Ku munota wa 24 Gilbert Mugisha yazamukanye umupira ku ruhande rw'iburyo awuha Jonathan Raphael DaSilva, rutahizamu w'umunya-Brazil wabanje mu kibuga ku nshuro ya mbere ariko ntiyashobora kureba mu izamu ryari ririnzwe na Munyaneza Jacques.

Mugisha Gilbert yahushije ubundi buryo bubiri bwari kubyara igitego cya Rayon Sports byatumye igice cya mbere kirangira amakipe yombi anganya 0-0.

Mu gice cya kabiri Rayon Sports yakomeje kugaragaza inyota yo gushaka igitego. ku munota wa gatatu gusa w'iki gice yahise ikibona.

Ni ku mupira wazamukanywe na Manishimwe Djabel awucomekera rutahizamu w'umunya-Ghana Michael Sarpong, wahindukiranye Ndayishimiye Dieudonne atera ishoti mu izamu.

Uyu rutahizamu yujuje igitego cya gatandatu ahita ayobora ba rutahizamu muri shampiyona y'u Rwanda, aho akurikiwe na Nizeyimana Djuma wa Kiyovu Sports ufite ibitego bitanu.

Mu minota yakurikiyeho amakipe yombi yakoze impinduka; AS Muhanga yinjiza Lomami André mu mwanya wa Bizimana Yannick naho Rayon Sports, iha umwanya Donkor Prosper na Mutsinzi Ange, basimbura Rwatubyaye Abdul na Djabel Manishimwe.

Izi mpinduka ntacyo zahinduye ku mukino waranzwe no gutinza iminota ku munyezamu Bashunga Abouba, wakinnye uyu mukino nyuma yo guterwa amabuye n'abantu batazwi mu rukerera rwo kuwa Kane, ariko umukino urangira atinjijwe igitego ahubwo ahesheje Rayon Sports arindira amanota atatu n'igitego 1-0 imbere ya AS Muhanga.

Abakinnyi 11 babanje mu kibuga ku mpande zombi

Rayon Sports: Bashunga Abouba, Iradukunda Eric, Abdul Rwatubyaye, Manzi Thierry, Rutanga Eric, Niyonzima Olivier Sefu, Yannick Mukunzi, Djabel Manishinimwe, Raphael DaSilva, na Michael Sarpong.

AS Muhanga: Munyaneza Jacques, Ndayishimiye Dieudonne, Hakundukize Adolphe, Yussuf Habimana, Yannick Bizimana, Ntirushwa Aimee, Rucogoza Elias, Bigirimana Shaban, Kagaba Obed, Bizimana Noël, na Turatsinze John.