Agüero w’imyaka 32, yageze muri Manchester City mu 2011, avuye muri Atlético Madrid yo muri Espagne.

Kuva icyo gihe, yayitsindiye ibitego 257 mu mikino 384 ndetse ni we mukinnyi watsinze byinshi mu mateka y’iyi kipe yo mu Mujyi wa Manchester.

Ku wa Mbere, Sergio Agüero yatangaje ko atazakomezanya na Manchester City ubwo amasezerano ye azaba arangiye ku mpera z’uyu mwaka w’imikino wa 2020/21.

Yagize ati “Tuyobowe na ba nyir’ikipe n’ubufasha bwa benshi mu bakinnyi, twabonye umwanya mu makipe akomeye ku Isi.”

Umuyobozi wa Manchester City, Khaldoon Al Mubarak, yatangaje ko Sergio Agüero azubakirwa ikibumbano hanze ya Etihad Stadium, iruhande y’ahari kubakwa icya Vincent Kompany wayibereye kapiteni ndetse na David Silva, bombi bayivuyemo mu 2019 na 2020.

Aba bakinnyi bose uko ari batatu bagize uruhare rukomeye mu ukuvuka gushya kwa Manchester City, by’umwihariko Agüero atsinda igitego cyo mu minota y’inyongera ubwo bakina na QPR mu 2012, bihesha iyi kipe igikombe cya Premier League cya mbere mu myaka 44.

Kuva icyo gihe, uyu rutahizamu w’Umunya-Argentine yafashije Manchester City gutwara ibindi bikombe bitatu bya Premier League, FA Cup imwe na League Cup inshuro eshanu.

Muri uyu mwaka w’imikino, Sergio Kun Agüero ntiyakinnye imikino myinshi kubera uburwayi n’imvune mu gihe Manchester City ikomeje gushaka uko yatwara ibikombe bine birimo icya Premier League, Champions League, FA Cup na League Cup.

Mu mikino 14 amaze kugaragaramo, Agüero yabanje mu kibuga inshuro icyenda, atsinda ibitego bitatu gusa.

Sergio Agüero yifuzwa n’amakipe atandukanye akomeye i Burayi ndetse agarukwaho cyane ni FC Barcelone, Paris Saint-Germain, Juventus, Inter Milan na Chelsea.

Ni uwa kane ku rutonde rw’abatsinze ibitego byinshi mu mateka ya Premier League n’ibitego 181, akurikiye Abongereza batatu: Alan Shearer (260), Wayne Rooney (208) na Andrew Cole (187).

Sergio Agüero yatangaje ko azava muri Manchester City ku mpera z'uyu mwaka w'imikino
Sergio Agüero yatangaje ko azava muri Manchester City ku mpera z'uyu mwaka w'imikino
Mu 2012, Manchester City yegukanye Premier League ibifashijwemo n'igitego cya Sergio Kun Agüero
Mu 2012, Manchester City yegukanye Premier League ibifashijwemo n'igitego cya Sergio Kun Agüero
Sergio Agüero (hagati) azubakirwa ikibumbano kuri Etihad Stadium, iruhande rw'icya Vincent Company (ibumoso) na David Silva (iburyo)
Sergio Agüero (hagati) azubakirwa ikibumbano kuri Etihad Stadium, iruhande rw'icya Vincent Company (ibumoso) na David Silva (iburyo)