Uyu rutahizamu w’imyaka 33 y’amavuko, kuri uyu wa Mbere nibwo yashyize umukono ku masezerano ye mu kipe ye nshya.

Nkuko iyi kipe yamaze no kubitangaza ibicishije ku mbuga nkoranyambaga zayo, uyu rutahizamu yasinye amasezerano y’imyaka ibiri izarangirana na 2022/23.

Bimwe bikubiye mu masezerano ye, ni uko ikipe yamwifuza mbere y’uko asoza amasezerano ye, yabanza kwishyura miliyoni 86 z’ama-pound.

Agüero agiye muri FC Barcelona nyuma yo kutabasha guhesha Manchester City igikombe cya Champions League kuko batsindiwe ku mukino wa nyuma na Chelsea 1-0.

Ubwo yari amaze gukina umukino we wa nyuma muri Manchester City, uwari umutoza we, Pep Guardiola yavuze ko babuze umuntu udasanzwe.

Ati "Turamukunda cyane. Ni umuntu udasanzwe, ni mwiza. Yamfashije byinshi. Ntabwo dushobora kumusimbuza. Ntabwo twabishobora. Hari abakinnyi benshi mu ikipe, Joe Hart, David Silva n’abandi badufashije muri iyi kipe."

Mu myaka icumi yamaze muri Manchester City, Agüero yatsinze ibitego 260 mu mikino 390 yakiniye iyi kipe.

Akiri muri Manchester City, uyu rutahizamu yegukanye ibikombe bitanu bya shampiyona, igikombe kimwe cy’igihugu, ibikombe bitandatu bitegurwa n’abashinzwe gutegura amarushanwa atarimo shampiyona mu Bwongereza, ibikombe bitatu bihuza iyegukanye shampiyona n’iyegukanye Igikombe cy’Igihugu.

Agüero yageze muri Manchester City mu 2011 ubwo yari avuye muri Atlètico Madrid yo muri Espagne.

Agüero yamaze gusinya amasezerano y'imyaka ibiri muri FC Barcelona

Agüero ubwo yakiniraga Atlètico Madrid

Babanje kumenya uko ubuzima bwe buhagaze

Ibizamini by'ubuzima nibyo bibanza mbere yo gusinya amasezerano

Muri Manchester City, Sergio Kun' Agüero yahatwaye ibikombe byinshi