Shampiyona y’u Bwongereza iri kugana ku musozo, aho habura imikino ibiri kuri buri kipe, umwaka w’imikino ukarangira ndetse hakamenyekana n’ikipe yegukanye irushanwa.

Mu makipe yitwaye neza muri uyu mwaka harimo Arsenal kugeza ubu iyoboye urutonde rwa Shampiyona y’u Bwongereza n’amanota 79, igakurikirwa na Manchester City ifite 77.

Ibi byatumye aya makipe agira abakinnyi beza mu bahanganiye ibihembo by’umwaka, aho Arsenal ifitemo batatu ari bo David Raya, Gabriel Magalhães na Declan Rice, naho Manchester City ikagiramo babiri, Antoine Semenyo na Erling Haaland.

Declan Rice yakinnye iminota 3009 muri uyu mwaka, ayifasha mu kibuga hagati, aho yaremye uburyo bwo gushaka ibitego bugera kuri 63.

Ubwugarizi bwa Arsenal burimo Gabriel Magalhães bwinjijwe ibitego 26 gusa muri uyu mwaka mu bitego 686 byinjijwe muri shampiyona y’u Bwongereza, ikaba ishaka gukora amateka yo kwinjizwa ibitego biri munsi ya 30 mu mwaka.

Mu gihe habura imikino ibiri David Raya amaze gukina imikino 18 atinjijweho igitego, kandi ni we mukinnyi wakinnye imikino yose ya shampiyona muri uyu mwaka muri Arsenal.

Antoine Semenyo yatangiriye uyu mwaka muri Bournemouth, atsinda ibitego 10 n’imipira ibiri ivamo ibitego mu mikino 20. Ageze muri Man City yatsinze ibindi bitego 16.

Erling Haaland uri guhatanira iki gihembo ku nshuro ya gatatu, akaba ari gushaka n’igihembo cy’uwinjije ibitego byinshi (26), na cyo yaba yegukanye ku nshuro ya gatatu.

Bruno Fernandes wa Manchester United iri ku mwanya wa gatatu ari muri abo bakinnyi. Uyu yatanze imipira 19 yavuyemo ibitego, aba umukinnyi wa gatatu utanze imipira myinshi mu mwaka, inyuma ya Thierry Henry watanze 20 mu 2002/03 na Kevin De Bruyne na we watanze 20 mu 2019/20.

Igor Thiago wa Brentford ari mu bahataniye igihembo, nyuma yo kwinjiza ibitego 22 wenyine ari na we mukinnyi ubitsindiye iyi kipe mu mwaka umwe, akaba Umunya-Brésil wa mbere wabitsinze mu mwaka umwe w’imikino mu Bwongereza.

Morgan Gibbs-White wa Nottingham Forest yayifashije kuba mu makipe meza, aho yatsinze ibitego 13 mu mikino 35 yakinnye, akaba umwe mu bakinnyi batsinze inshuro nyinshi hatarimo penaliti.

Manchester City kandi ifite abakinnyi babiri mu munani bahataniye igihembo cy’abakiri bato. Abo ni Nico O’Reilly na Rayan Cherki. Indi kipe ifitemo abakinnyi babiri ni AFC Bournemouth ifite Eli Junior Kroupi na Alex Scott.

Aba bahataniye iki gihembo ni Kobbie Mainoo wa Manchester United, Mateus Fernandes wa West Ham, Lewis Hall wa Newcastle na Michael Kayode wa Brentford.

Abatoza bahataniye igihembo cy’umwaka, ni Andrews wa Brentford, Arteta wa Arsenal, Michael Carrick wa Manchester United FC, Le Bris wa Sunderland, Pep Guardiola wa Manchester City na Andoni Iraola wa AFC Bournemouth.