Minisitiri w’intebe w’u Bwongereza David Cameron yatangaje ko atifuza ko umwana we akurana imico nk’iya Luis Suarez. Iri jambo umutoza wa Suarez avuga ko ryahereweho mu kumuhagarikira umukinnyi imikino icumi adakandagira mu kibuga, nyuma yo kuruma Ivanovic.

Nk’uko the Sun dukesha iyi nkuru ibitangaza, Cameron yabwiye abaherwe b’ikipe ya Liverpool ko igikorwa Suarez yakoze cyo kuruma Ivanovic umukinira ikipe ya Chelsea ubwo bahuraga mu mukino wa shampiyona yo muri iki gihugu wabahuje tariki ya 21 Mata 2013 kidakwiye.

Cameron yavuze ko urugero rw’imyitwarire ya Suarez ruteye ubwoba cyane ku bana, agira ati “mfite umwana w’imyaka irindwi ukunda ruhago, ariko mu gihe abakinnyi bitwara nabi gutya biteye agahinda.”

Rogers yavuze ko iri jambo ishyirahamwe ry’umupira w’amaguru mu Bwongereza FA ryarihereyeho rihagarika uyu mukinnyi imikino icumi adakandagira mu kibuga. Gusa ngo ku bijyanye na Suarez, Rogers yavuze ko nyuma yo guhanwa byibagiranye n’ubwo ngo ikosa yakoze ryatumye bamwigirizaho nkana mu kumuhana.

Cameron we yahise atangaza ko FA yigenga kandi n’ibyo isabwa gukora idashobora gutanga ibihano ihereye ku ijambo rye.

Umukinnyi Suarez yakunze kugaragaraho uducabiranya dutandukanye mu kibuga mu gihe akibukwa cyane ari umupira yafashe mu mikino y’igikombe cy’Isi cyo mu 2010 mu mukino bakinaga na Ghana.