Nyuma yo kugira ibihe byiza mu Rwanda mu myaka ibiri ishize aho yatsinze ibitego 12 mu Amagaju FC mu mwaka w’imikino 2016-17 no gufasha Rayon Sports kugera mu matsinda ya CAF Confederation Cup 2018, ikanayitwaramo neza, Tchabalala yashimwe anagurwa na Baroka FC.
Iyi kipe irwanira kutamanuka muri Afurika y’Epfo, ntabwo yashimye urwego rwa Tchabalala bituma atabona umwanya wo gukina inamurekura mu Ukuboza 2018.
Yabwiye IGIHE ko amakipe yo mu Rwanda arimo Mukura VS, yamwifuje kuko yari amaze hafi ukwezi n’igice ari i Burundi nta kipe afite ariko we ahitamo kujya gukina muri Ethiopia.
Yagize ati “Natandukanye na Baroka FC ngirana ibiganiro n’amakipe atandukanye yo mu Rwanda. Abagaragaje ko banyifuza cyane ni abayobozi ba Mukura VS, bifuzaga ko nabakinira iyo babona itike y’amatsinda y’imikino ya CAF. U Rwanda ni igihugu nkunda kandi nagiriyemo amahirwe ariko umupira ni akazi kanjye, nahisemo aho bampa amafaranga menshi.”
Iyi kipe iyoboye urutonde rwa shampiyona muri Ethiopia itozwa na Didier Gomes Da Rosa, Umufaransa nawe watoje Rayon Sports yo mu Rwanda mu 2013-14.
Shaban Hussein Tchabalala abaye umukinnyi wa kabiri usinyiye Coffee Sport Club ukomoka muri Afurika y’Iburasirazuba nyuma y’umunyezamu wa Uganda Ismail Watenga.
TANGA IGITEKEREZO