U Bufaransa bwatsinze u Busuwisi ibitego 5-2 burategereza umukino wa Honduras na Equateur ngo bizera itike ya 1/8 mu gihe Karim Benzema yabaye umufaransa wa mbere uhushije penaliti mu mukino hagati mu gikombe cy’Isi.

Nyuma yo kudahirwa n’igikombe cy’Isi cya 2010 muri Afurika y’Epfo, u Bufaransa bwashoboye kuyobora bunatsinda umukino wa kabiri w’iyi mikino iri kubera muri Amerika y’Epfo.

Ku munota wa 17, Olivier Giroud yafunguye amazamu y’u Busuwisi ku mupira yaherejwe na Mathieu Valbuena. Ni igitego cya 100 u Bufaransa butsinze mu gikombe cy’Isi kuva kucya Lucien Laurent cyafunguye igikombe cy’Isi 1930.

Hashize amasegonda 66 Giroud atsinze, Blaise Matuidi yatsinze igitego cya kabiri aherejwe na Karim Benzema, igitego cya mbere gitsinzwe hagati y’intera nto muri iki gikombe cy’Isi. Ni ubwa mbere kuva mu1986, umukinnyi wa Paris Saint Germain atsindira u Bufaransa.

Benzema yakorewe ikosa na Johan Djourou ku munota wa 32, ateye penaliti igarurwa n’umunyezamu, Debuch asonzemo ukubita umutambiko w’izamu. U Bufaransa bumaze gutsinda penaliti 7 mu gikombe cy’Isi.

Niyo penaliti ya mbere ihushijwe muri iyi mikino iri kubera muri Brazil, zirindwi zimaze kwinjira.

Mbere yo kujya kuruhuka myugariro Raphael Varane yahereje Olivier Giroud wasize ab’inyuma b’u Busuwisi ahereza Valbuena atsinda icya gatatu. Uyu ukinira Marseille niwe mukinnyi rukumbi umaze gutangira imikino yose 24 yatojwe na Didier Deschamps.

U Bufaransa bwaherukaga gutsinda ibitego 3 mu mukino umwe mu gikombe cyo mu 1998.

Ku munota wa 63, Paul Pogba asimbura Olivier Giroud, aha umupira Karim Benzema ku munota wa 67 atsinda igitego cya kane.

Nyuma y’iminota 6, Benzema yahereje Moussa Sissoko atsinda igitego cya gatanu ku busa bw’u Busuwisi. U Bufaransa bwaherukaga gutsinda nibura ibitego 5 cyangwa birengaho tariki ya 28 Kamena 1958 batsinda u Budage.

Blerim Dzemaili yatsindiye u Busuwisi igitego cya mbere ku mupira watewe hahanwa ikosa (coup franc). Nicyo gitego rukumbi cya coup franc kimaze kuboneka muri Brazil naho Granit Xhaka atsinda impozamarira.

Umukino wa nyuma wo mu itsinda E, u Bufaransa buzakina na Equateur naho u Busuwisi bukine na Honduras kuwa Gatatu, tariki ya 25 Kamena 2014.

[email protected]