Nubwo bari bafite itike ya 1/8 cy’irangiza, u Buholandi bwashakaga umwanya wa mbere mu itsinda B bwatsinze Chili ya kabiri ibitego 2-0, biyirinda guhura na Brazil ishobora kurangiza ari iya mbere mu itsinda A.

Uyu mukino wasifuzwe n’abasifuzi barimo Umunyarwanda Kabanda Felicien.

Chili binyuze kuri Alex Sanchez yagoye mu gice cya mbere u Buholandi butari bufite kapiteni Robin Van Persie wahagaritswe kubera amakarita y’umuhondo, byatumye ku nshuro ya mbere mu myaka 14 ishize u Buholandi bukina budafite umukinnyi ufite izina “Van”.

U Buholandi bwaherukaga gukina nta Van mu 2000 butsinda u Bufaransa ibitego 3-2 mu gikombe cy’u Burayi. Dirk Kuyt yakinaga umukino wa 99.

Mu gice cya kabiri, u Buholandi bwatangiye gukina imipira miremire kuri Contre attaque.

Ku munota wa 66, Arjen Robben yagerageje amahirwe yo kubona igitego, ishoti rye rigarurwa na Claudio Bravo. Nyuma y’iminota itatu, Memphis Depay wari watsinze igitego cya gatatu bakina na Australia asimbura Jeremain Lens.

Ku munota wa 79, Wesley Sneijder yasimbuwe na Leroy Fer watsinze igitego n’umutwe, niwo mupira wa mbere yari akozeho. Iki nicyo gitego cyihuse cy’umukinnyi usimbuye muri iki gikombe cy’Isi, nyuma y’amasegonda 91.

Mbere y’uko uyu mukino urangira, Visi kapiteni w’u Buholandi, Arjen Robben wari kapiteni muri uyu mukino, yahereje umupira Memphis Depay nyuma yo gusiga ba myugariro ba Chili, atsinda igitego. U Buholandi burangije imikino yo mu matsinda n’amanota 9 budatsinzwe.

Ni ku nshuro ya kabiri muri iyi mikino, abakinnyi babiri basimbura bagatsinda ibitego.

Kuba u Buholandi burangije ku mwanya wa mbere mu itsinda B buzahura n’iya kabiri mu itsinda A ishobora kuba Mexique cyangwa Croatia, mu gihe Chili yahura na Brazil ya mbere itsinze Cameroun.

Ubwo Chili yakiraga iyi mikino mu 1982 yabonye umwanya wa gatatu, umwanya mwiza mu gikombe cy’Isi. Mu 1998 na 2010, Chili yasezerewe na Brazil muri 1/8 cy’irangiza. Ni umukino wa kabiri mu mikino 13 iki gihugu kitabashije gutsinda igitego.

U Buholandi ntiburatsindirwa mu mikino yo mu matsinda kuva mu 1994, ni inshuro ya kabiri mu bikombe bibiri bikurikirana babona amanoyta 9 ku 9.

[email protected]