Mu gihe Costa Rica na Colombia zamaze kubona itike ya 1/8, Uruguay iracakirana n’u Butaliyani naho Cote d’Ivoir ikine n’u Bugereki zishakamo izikomeza mu itsinda C na D.

Saa 18.00:

Costa Rica vs u Bwongereza @ Estadio Mineirão

Costa Rica yabonye itike ya 1/8 nyuma yo gutsinda imikino ibiri ibanza irakira u Bwongereza bwamaze gusezererwa.

Umutoza w’u Bwongereza Roy Hodgson wahawe icyizere n’ubuyobozi bw’Ishyirahamwe ry’umupira w’amaguru (FA) ko azakomeza gutoza kugera mu 2016, yakoze impinduka 9 mu ikipe yatsinzwe na Uruguay asigamo gusa myugariro Gary Cahill na rutahizamu Daniel Sturridge.

Mu izamu harimo Ben Foster waherukaga gufatira u Bwongereza mu 2009 bakina na Bielarussie.

Ba myugariro ni Gary Cahill ufatanya na Phil Jones, Chris Smalling na Luke Shaw mu gihe hagati hayoborwa na kapiteni Frank Lampard, James Milner,Ross Barkley, Jack Wilshere na Adam Lallana. Rutahizamu akaba Sturridge gusa.

Costa Rica ishobora kuruhutsa Bryan Luiz na Joel Campbel.

Umutoza Roy Hodgson yahinduye ikipe asigamo Gary Cahill na Daniel Sturridge

Ni ubwa mbere u Bwongereza butsinzwe imikino ibiri ibanza yo mu matsinda, bwa mbere basezererwa mu mikino yo mu matsinda kuva mu 1958.

Muri iri tsinda, Uruguay irakina n’u Butaliyani bashaka ikomeza muri 1/8 na Costa Rica.

Umutaliyani Ciro Immobile ashobora kubanza mu kibuga mu gihe Uruguya yakinnye n’u Bwongereza itarimo kapiteni Diego Lugano na Maxi Pereira ishobora kubanza.

U Butaliyani bukeneye kunganya ngo bukomeze kuko burusha Uruguay igitego bazigamye.

Iyi kipe yatwaye igikombe mu 2006 yasezerewe inshuro enye zikurikirana mu matsinda y’igikombe cy’Isi hagati ya 1950-1966.

Mu gihe Brazil yaraye ikinnye umukino wa 100, Uruguay irakina uwa 50. Nibura ibihugu 8 byonyine nibyo bimaze kuyikina mu gikombe cy’Isi.

Mu mikino irindwi y’igikombe cy’Isi amaze gukina, Luis Suarez yatsinzemo ibitego 5.

Mu mikino 7 yakinnye mu gikombe cy'Isi, Suarez yatsinzemo ibitego bitanu

Ciro Immobile ashobora guhabwa icyizere n'umutoza Cesare Prandeli

Saa 22.00:

U Buyapani vs Colombia @Arena Pantanal

Mu itsinda C, Cote d’Ivoir ishaka itike ya 1/8 ku nshuro ya mbere irasabwa gutsinda u Bugereki.

Iyi kipe yamaze kongererwa agahimbazamusyi na Perezida Alassane Ouattara irakina nta myugariro Didier Zokora bivuze ko Kolo Toure ashobora gutangira.

Biracyateza impaka impamvu umutoza Sabri Lamouchi yicaza Didier Drogba agakinisha Wilfred Bony. Gusa ni ibihe byiza kuri Gervinho ushobora kwinjira mu mateka y’Afurika igihe yaba atsinze igitego u Bugereki, akaba uwa mbere utsinze mu mikino itatu ikurikirana.

Iki gikombe cy’Isi gishobora kuba icya nyuma ku kiragano cya Didier Drogba n’aba Yaya bari mu cyunamo cya murumuna wabo uherutse gupfa, bamaze gukina ibikombe bitatu biheruka.

Cote d'Ivoir itegerejweho kubona bwa mbere itike ya 1/8 muri iki gikombe gishobora kuba icya nyuma kuri benshi

Colombia yabonye itike mu itsinda C irakina n’u Buyapani bwabona itike ya 1/8 nyuma yo gutsinda ku nshuro ya mbere ikipe yo muri Amerika y’Epfo ndetse Cote d’Ivoir ikaba yanganyije n’u Bugereki.

Ikipe iyobora itsinda D ririmo Colombia, Uruguay n’u Butaliyani izakina n’iya kabiri muri C ya Cote d’Ivoir na Colombia, naho iya mbere aha ikine n’iya kabiri muri D.

Honda ahanzwe amaso guhesha u Buyapani itike ya 1/8 mu gihe u Bugereki bwanganya na Cote d'Ivoir batsinze Colombia

[email protected]