Mu ijoro ryo ku wa Kabiri, tariki ya 20 Mutarama 2026, ni bwo ku bibuga bitandukanye i Burayi hatangiye gukinwa imikino y’Umunsi wa Karindwi wa UEFA Champions League.

Kairat Almaty yo muri Kazakhstan yakiriye Club Brugge yo mu Bubiligi, inanirwa kwitwara neza iwayo ihatsindirwa ibitego 4-1.

Hakurikiyeho umukino wa Manchester City yo mu Bwongereza, aho yatsinzwe na FK Bodø/Glimt yo muri Norvège ibitego 3-1. Kasper Hogh yinjije ibitego bibiri, mugenzi we Jens Hauge ashyiramo icya gatatu.

Ni mu gihe icy’impozamarira cy’iyi kipe yo mu Bwongereza cyatsinzwe na Rayan Cherki mbere y’uko Rodri ahabwa ikarita itukura.

F.C. Copenhagen yanganyije na Napoli yo mu Butaliyani igitego 1-1 mu mukino Thomas Delaney w’iyi kipe yo muri Denmark yerekewemo ikarita itukura.

Umukino w’umunsi wari wa Inter Milan yo mu Butaliyani na Arsenal yo mu Bwongereza yakomeje kwandika amateka muri iri rushanwa, aho yatsinze ibitego 3-1, uba umukino wa karindwi itsinze yikurikiranya.

Ibitego byayo byatsinzwe na Gabriel Jesus washyizemo bibiri na kimwe cya Viktor Gyökeres. Ni mu gihe icya Inter cyatsinzwe na Petar Sucic.

Arsenal yakomeje kuba ku mwanya wa mbere wa UEFA Champions Lague n’amanota 21, dore ko ari yo yonyine itaratsindwa cyangwa ngo inganye umukino n’umwe.

Abakunzi ba Real Madrid na bo baraye mu byishimo nyuma y’uko ikipe yabo inyagiye AS Monaco ibitego 6-1. Kylian Mbappé yinjije bibiri, Franco Mastantuono atsinda kimwe, kimwe cya Vinicius Junior, kimwe cya Jude Bellingham n’ikindi Thilo Kehrer yitsinze.

Indi mikino yabaye yasize Olympiacos F.C. itsinze Bayer Leverkusen ibitego 2-0, Sporting ntiyorohera Paris Saint-Germain yo mu Bufaransa iyitsinda ibitego 2-1, Tottenham yakira Borussia Dortmund ishimisha abakunzi bayo itsinda 2-0, naho Villarreal itsindwa na Ajax ibitego 2-1 Ajax.