Mu ijoro ryo ku wa Kabiri, tariki ya 17 Werurwe 2026, ni bwo mu mijyi itandukanye y’i Burayi hakiniwe imikino yo kwishyura ya ⅛ cya UEAF Champions League.

Umukino wabimburiye indi ni uwahuje Sporting yo muri Portugal yakiriye FK Bodø/Glimt yo muri Norvège, isabwa kuyinyagira kugira ngo ikomeze, dore ko hanze yari yahatsindiwe ibitego 3-0.

Muri uyu mukino Sporting yatsinze ibitego 5-0, ibona itike yo gukina ¼ cy’iri rushanwa. Ni ibitego byashyizwemo na Gonçalo Inácio, Pedro Gonçalves, Luis Suárez, Maximiliano Araújo na Rafael Nel.

Umukino wari utegerejwe na benshi ni uwa Arsenal yakiriye Bayer Leverkusen kuri Emirates Stadium, isabwa kuhatsindira kuko umukino ubanza yanganyirije mu Budage igitego 1-1.

Iyi kipe yo mu Bwongereza yitwaye neza kuko yatsinze ibitego 2-0, byatumye ikomeza ku giteranyo cy’ibitego 3-1 mu mikino yombi. Ibitego byashyizwemo na Eberechi Eze ku munota wa 36 na Declan Rice ku munota na 63.

Chelsea FC na yo yo mu Bwongereza yahuye n’uruva gusenya, itsindwa na Paris Saint-Germain ibitego 3-0 byiyongera kuri 5-2 yatsinzwe mu mukino ubanza, isezererwa ku giteranyo cy’ibitego 8-2.

PSG yafashijwe gutsinda na Khvicha Kvaratskhelia ku munota wa gatandatu, Bradley Barcola ku munota wa 14, ndetse na Senny Mayulu washyizemo agashinguracumu ku munota wa 62.

Undi mukino wari uwa Manchester City yo mu bwongereza yasabwaga kwigaranzura Real Madrid yo muri Espagne yayitsinze ibitego 3-0 mu mukino ubanza, ikareba ko yabyishyura.

Burya ngo aho umutindi yanitse ntiriva! Ku munota wa 20 w’umukino, Bernardo Silva wa Man City yakoze umupira ari mu rubuga rw’amahina, ahabwa ikarita itukura na penaliti kuri Real Madrid yavuyemo igitego cya mbere cyinjijwe na Vinicius Junior.

Ni igitego cyishyuwe na Erling Haaland ku munota wa 41, ariko ku munota wa gatatu w’inyongera y’igice cya kabiri, Vinicius Junior, atsinda igitego cya kabiri cya Real Madrid cyayihesheje itike ya ¼.

Nyuma y’iyi mikino hateganyijwe indi iba kuri uyu wa Gatatu, tariki ya 18 Werurwe 2026. FC Barcelone irakina na Newcastle United, Bayern Munich na Atalanta, Liverpool na Galatasaray ndetse na Tottenham Hotspur na Atletico Madrid.