Aya makipe yombi yahuriye mu mukino wo kwishyura kuko ubanza bawukiniye Allianz Arena mu Budage. Uyu waberaga kuri Stade ya FC Barcelona, Spotify Camp Nou.

Ikipe ya Bayern Munich yinjiye mu mukino mbere ya FC Barcelona, ihita itsinda igitego cya mbere ku mupira Sadio Mané yahawe na Serge Gnabry, akawushyira mu izamu. Ntabwo ikipe ya Barcelona yigeze ibona agahenge kuko ku munota wa 31, batsinzwe ikindi gitego cya Kabiri.

Iki gitego cyashyizwe mu izamu na Eric Maxim Choupo Moting, nawe wahawe umupira na Serge Gnabry. Igice cya mbere cyarangiye ari ibitego 2-0, mbere yuko bajya mu karuhuko.

Bayern Munich yaje muri iki gice nacyo ikomeza gusatira izamu bituma iza no kubona ikindi gitego cyatsinzwe na Gnabry, ariko VAR iracyanga. Ntibyarangiriye aho ariko mu minota itanu yongeweho nyuma y'iminota 90′, Benjamin Pavard yahawe umupira na Gnabry wari mwiza muri uyu mukino maze atsinda igitego cya Gatatu.

Uyu mukino wose nta shoti na rimwe FC Barcelona yateye rigana ku izamu, mu gihe amashoti yatewe ntagere ku muzamu nayo ari ane gusa.

Uyu mukino warangiye ari ibitego 3-0, watumye Barcelona iguma ku manota ane mu itsinda riyobowe na Bayern Munich ifite 15, Inter Milan ifite 10 na Viktoria Plzen.

FC Barcelona yamaze kumanuka mu irushanwa rya Europa League. Iri rushanwa ni ku nshuro yayo ya kabiri iryitabiriye yikurikiranya kuva mu mwaka wa 2021-2022.

Izi kipe nazo kimwe n'izindi zisigaranye umukino umwe mu matsinda, mbere y'uko imikino ya ⅛ itangira. Uyu mukino Barcelona izawukina na Viktoria Plzen, naho Bayern Munich na Inter Milan zamaze kubona itike nazo zikine.

Mu yindi mikino yabaye, Liverpool yagiye mu Buholandi itsindirayo Ajax ibitego 3-0, Napoli itsindira Rangers ibitego 3-0 mu Butaliyani. Club Brugge yatsinzwe na FC Porto ibitego 4-0, Atletico Madrid inganya na Bayern Leverkusen ibitego 2-2.

Eintracht Frankfurt yatsinze bigoranye ikipe ya Marseille ibitego 2-2. Tottenham inganya na Sporting CP igitego 1-1.

Imikino ya UEFA Champions league irakomeza mu Cyumweru gitaha tariki ya 1 na 2 Ugushyingo 2022.

Kuri uyu wa Kane imikino ihuza amakipe y'i Burayi muri Europa League irakomeza aho Arsenal ikina na PSV Eindhoven naho Manchester United ikine na FC Sheriff.