Kuri uyu wa 2 Ukwakira 2018 hakinwaga umunsi wa kabiri w’amatsinda mu irushanwa rihuza amakipe yabaye aya mbere iwayo ku mugabane w’Uburayi, irushanwa rirebwa kurusha andi ahuza amakipe ku Isi.

Kuri stade Old Trafford, José Mourinho yari yakoze ku ntwaro ze nka David de Gea, Paul Pogba, Marcus Rashford, Lomelu Lukaku na Alexis Sanchez.

Nyamara aba bakinnyi bari mu bahenze kurusha abandi ku Isi ntibashoboye guhesha ikipe yabo intsinzi kuko banganyije 0-0 na Valencia Club de Fútbol igendera ku bakinnyi nka Gabriel Paulista, Franciss Coquelin bombi bavuye muri Arsenal, Geoffrey Kondogbia, na Michy Batshuayi watijwe na Chelsea.

Mu yindi mikino, Real Madrid ifite ibikombe bitatu bya UEFA Champions League biheruka yasuye CSKA Moscow, itsindirwa mu Burusiya igitego kimwe ku busa cyinjijwe na Nikola Vlašić ku munota wa kabiri.

Iyi kipe yo muri Espagne yahise yuzuza imikino itatu nta ntsinzi, bingana n’imikino itatu ishize itarinjiza igitego, ibintu yaherukaga mu myaka hafi 12 ishize. Real Madrid yaherukaga ibihe nk’ibi muri Mutarama 2007.

Juventus FC yari mu rugo yo nta kosa yakoze kuko nubwo itari ifite Cristiano Ronaldo wahawe ikarita itukura mu mukino uheruka, yatsinze 3-0 Young Boys yo mu Busuwisi, byose byinjijwe na rutahizamu w’umunya-Argentine, Paulo Bruno Exequiel Dybala.

AS Roma yo mu Butaliyani yanyagiye Viktoria Plzen 5-0, harimo bitatu bya rutahizamu Edin Džeko. Iyi kipe yamugoreweho kuko muri Europa League mu myaka ibiri ishize, Džeko nabwo yayitsinze ibitego bitatu.

Mu 2013-2014 ubwo yakiniraga Manchester City muri Champions League, nabwo yayinjije ibitego bibiri wenyine. Mu myaka ya 2005-07 nabwo yayinjije ibitego bibiri ubwo yakiniraga Teplice yo muri Repubulika ya Czech.

Indi kipe ikomeye yasitaye ni Bayern Munich yujuje imikino itatu idatsinda, ndetse Ajax yayihushije ibitego byinshi mu mukino wabaye kuri uyu wa Kabiri.

Manchester City yo yabashije gutsinda Hoffenheim mu Budage ibitego 2-1, mu mukino waranzwe n’imanzuro y’umusifuzi itishimiwe n’umutoza Pep Guardiola.

Uko imikino yose yagenze:

• Juventus 3-0 Young Boys

• Manchester United 0-0 Valencia

• CSKA Moscow 1-0 Real Madrid

• Roma 5-0 Viktoria Plzen

• Hoffenheim 1-2 Manchester City

• Lyon 2-2 Shakhtar Donetsk

• AEK Athens 2-3 Benfica

• Bayern Munich 1-1 Ajax