Kuri uyu wa Gatanu, tariki ya 30 Mutarama 2026, ni bwo habaye tombola ku makipe yabonye itike yo gukomeza muri UEFA Champions League ariko abanje kunyura muri kamarampaka.

Amakipe yageze muri iki cyiciro ni ayabashije kugaragara mu myanya yo kuva ku wa cyenda kugeza ku wa 24.

Real Madrid yo muri Espagne izahura na Benfica yo muri Portugal, Inter Milan mu Butaliyani izahura na FK Bodø/Glimt yo muri Norvège, mu gihe izizakomeza zizahura n’imwe hagati ya Manchester City yo mu Bwongereza na Sporting yo muru Portugal zakomeje mbere.

Real Madrid yatomboye Benfica iheruka kuyitsinda ibitego 4-2, mu mukino w’Umunsi wa Munani wa UEFA Champions League.

Borussia Dortmund yahuye na Atalanta, Olympiacos ihura na Bayer Leverkusen, naho izizava hagati yazo zikazahura na Arsenal cyangwa Bayern Munich zabonye amatike ya ⅛ mbere.

Galatasaray yatomboye Juventus, Club Brugge itombora Atletico Madrid, mu gihe izizatsinda hagati yazo ikazahura na Liverpool cyangwa Tottenham Hotspur zo mu Bwongereza.

Andi makipe yatomboranye ni AS Monaco izahura na Paris Saint-Germain, Qarabag ihure na Newcastle United, mu gihe izava hagati yazo izakina na FC Barcelone cyangwa Chelsea zabonye itike rugikubita.

Imikino ibanza ya kamarampaka iteganyijwe tariki ya 17 Gashyantare, iyo kwishyurwa ikazaba tariki ya 24 Gashyantare 2026.