Uyu mukino urabera mu Mujyi wa Paris mu Bufaransa kuri Parc des Princes saa Yine z’ijoro kuri uyu wa Kabiri, tariki 14 Gashyantare 2023.

UEFA Champions League yasubukuwe nyuma y’igihe kirekire idakinwa kuko hitambitsemo n’imikino y’Igikombe cy’Isi cyabereye muri Qatar mu mpera za 2022.

PSG imaze imyaka myinshi yifuza gutwara iki gikombe gifatwa nk’igikomeye i Burayi ariko inzozi zayo ntiziraba impamo.

Iyi kipe irahura na Bayern Munich itaryamye kuko na yo ihora mu makipe ahabwa amahirwe yo kwegukana iki gikombe, imaze gutwara inshuro esheshatu.

Abakinnyi b’umutoza Christophe Galtier ntabwo uyu mwaka uri kubahira cyane kuko mu minsi ishize basezerewe mu Gikombe cy’Igihugu (Coupe de France) na Marseille, ndetse banatakaza umukino ku bitego 3-1.

Nubwo PSG iri kugaragaza ukudahozaho mu mikino yayo, ku rutonde rwa Shampiyona iracyayoboye, ndetse harimo n’ikinyuranyo cy’amanota atanu hagati yayo n’iyikurikiye. Haribazwa niba byayiha icyizere cyo guhangana n’ikipe yayisezereye ku mukino wa nyuma wa UEFA Champions League ya 2020/2021.

PSG kandi byarashobokaga ko yazakina n’ikipe yoroshye muri iki cyiciro, ariko ntibyari gukunda kuko yazamutse mu itsinda yari iherereyemo iri ku mwanya wa kabiri.

Umwaka ushize PSG yakinnye iki cyiciro ariko ntiyakirenga kuko yakuwemo na Real Madrid, gusa kuba imaze imikino 15 idatsindirwa ku kibuga cyayo ni intambwe nini iyiganisha ku musaruro mwiza iwayo.

Ntabwo ari muri Shampiyona ya Ligue 1 gusa, ahubwo no mu mikino irindwi iheruka, itandatu yose yabereye Parc des Princes yarayegukanye. Aha harimo imikino ikomeye nk’uwa Manchester City, Real Madrid na Juventus. Gusa ubwo iheruka guhura na Bayern Munich yatsinzwe 1-0 muri Mata 2021.

Bayern Munich na yo ikiva mu kiruhuko, yaranzwe no gutakaza imikino myinshi yiganjemo kunganya cyane gusa mu byumweru bishize ni bwo yagaragaje ko iri kugaruka ndetse byanatumye ikuramo amanota yari hagati yayo n’ikipe yari imbere muri Bundesliga ya Union Berlin.

Abakinnyi b’Umutoza Julian Nagelsmann bamaze kwerekana ko uwo bazahura wese batazamworohera, kuko mu mikino itatu baheruka yose batsinze ibitego 11. Aha harimo bine binjije FSV Mainz 05 na VfL Wolfsburg ndetse na bitatu Thomas Müller, Kingsley Coman na Serge Gnabry batsinze VfL Bochum 1848.

Nubwo yanganyaga ariko yamaze kubirindura ikipe yari imbere, ifata umwanya wa mbere uyiganisha ku gikombe cya Shampiyona yifuza kwegukana ku nshuro ya 11 yikurikiranya, nubwo mukeba wayo Borussia Dortmund iyiri hafi n’ikinyuranyo cy’amanota atatu gusa.

Mu mikino y’amatsinda Bayern Munich yari mu rikomeye, kuko yari kumwe na FC Barcelone itarabonye itike, Inter Milan zazamukanye na FC Viktoria Plzeň. Iyi mikino yose yari yabashije kuyitsinda izamuka iyoboye n’amanota yuzuye.

Iramutse itsinze umukino wayo wa PSG yaba isubiyemo amateka yakoze mu 2019/2020 ubwo yatsindaga imikino irindwi muri iri rushanwa yikurikiranya. Mu nshuro 10 ziheruka muri iri rushanwa, Bayern Munich yageze muri iki cyiciro harimo n’eshatu yegukanyemo igikombe.

Paris Saint-Germain igiye gukina uyu mukino iri mu mwuka mwiza wo kugarura abakinnyi bayo bakomeye baherutse kugira imvune. Aba barimo Lionel Messi utarakinnye umukino uheruka, Kylian Mbappé na Marco Verratti.

Kylian Mbappé agarutse mu ikipe nyuma yo kumara imikino itatu yitabwaho n’abaganga, ariko akaba akize vuba ugereranyije n’igihe cyari cyatangajwe ko azakirira. Uyu rutahizamu ashobora no kubanza hanze kuko ataramera neza cyane.

Abakinnyi PSG idafite kuri uyu mukino ni Renato Sanches na Nordi Mukiele mu gihe Fabián Ruiz wagize akabazo k’uburwayi budakabije bwatumye adakina umukino wa AS Monaco ameze neza.

Ubwo PSG yatsindwaga umukino Galtier yabanje hanze Achraf Hakimi, Nuno Mendes na Sergio Ramos benshi bahise batekereza ko yababikiye uwa Bayern Munich.

Kuri Bayern, yasinyishije umunyezamu Yann Sommer ugiye gukina UEFA Champions League bwa mbere, kugira ngo aze kuyifasha kuziba icyuho cya Manuel Neuer utazongera kugaragara mu kibuga mu mikino yose isigaye uyu mwaka.

Ryan Gravenberch, Noussair Mazraoui, Lucas Hernandez na Sadio Mané ntibaza kugaragara kuri uyu mukino, ariko Joshua Kimmich yiteguye kugaruka mu kibuga agafatanya na Leon Goretzka mu kibuga hagati.

Abakinnyi Paris Saint Germain ishobora kubanza mu kibuga Gianluigi Donnarumma, Achraf Hakimi, Marquinhos, Sergio Ramos, Nuno Mendes, Fabián Ruiz, Danilo Pereira, Marco Verratti, Carlos Soler, Lionel Messi na Neymar Junior.

Abakinnyi Bayern Munich iza kwitabaza ni Yann Sommer, João Cancelo, Matthijs De Ligt, Dayot Upamecano, Alphonso Davies, Joshua Kimmich, Leon Goretzka, Leroy Sané, Jamal Musiala, Kingsley Coman na Eric Maxim Choupo-Moting.

Amakipe yombi amaze guhura inshuro 11, PSG yatsizemo esheshatu mu gihe Bayern Munich yabonye intsinzi eshanu. Nta kunganya kurabaho hagati y’impande zombi.

Kuri uyu wa Kabiri kandi hateganyijwe umukino uhuza AC Milan yo mu Butaliyani na Tottenham Hotspur yo mu Bwongereza.

Imikino ya Champions League izakomeza ku wa Gatatu, tariki ya 15 Gashyantare 2023,
Borussia Dortmund yakira Chelsea FC mu gihe Club Brugge izacakirana na SL Benfica.

Paris Saint-Germain na Bayern Munich zigiye gukina umukino wa UEFA Champions League wa 1/8

Paris Saint-Germain yiteguye gucakirana na Bayern Munich mu mukino w'ishiraniro

Kylian Mbappé yatsinze ibitego bitatu mu mikino ibiri yakiniye Allianz Arena, stade ya Bayern Munich