Ku wa 8 Mata 2026, ni bwo FC Barcelone yakiriye Atlético Madrid kuri Spotify Camp Nou, mu mukino ubanza wa ¼ cya UEFA Champions League wari ishiraniro.

Umukino ugeze ku munota wa 44, myugariro wa FC Barcelone Pau Cubarsí, yeretswe ikarita y’umutuku nyuma yo gukorera ikosa Giuliano Simeone wa Atlético Madrid wari ushatse kumusiga.

Iri kosa ntabwo ryigeze rivugwaho rumwe, bituma FC Barcelone itanga ikirego muri UEFA igaragaza ko yarenganyijwe n’abasifuzi bo kuri uyu mukino by’umwihariko István Kovács wari mu kibuga hagati.

Nyuma yo gusuzuma iki kirego, Akanama Nkemurampaka n’Akanama gashinzwe Imyitwarire muri UEFA, katangaje ko nta shingiro gifite.

Yagize iti “Bigendanye n’umukino wa ¼ wabaye ku wa Gatatu, tariki ya 8 Mata 2026, hagati ya FC Barcelone na Atlético de Madrid, Barcelone yatanze ikirego kigendanye no kutishimira ibyemezo by’abasifuzi.”

“Ku wa 13 Mata 2026, Akanama gashinzwe imyitwarire n’urwego rushinzwe gukemura impaka, byasanze ikirego nta shingiro gifite.”

Iri tangazo ryashyizwe hanze nyuma y’uko amakipe yombi akomeje kwitegura umukino ukomeye wo kwishyura ubera kuri Riyadh Air Metropolitano, dore ko FC Barcelone isabwa kwishyura ibitego 2-0 yatsinzwe mu mukino uheruka.

Undi mukino wa UEFA Champions League uteganyijwe urahuza Liverpool yo mu Bwongereza ihura na Paris Saint-Germain yo mu Bufaransa yayitsinze ibitego 2-0 mu mukino ubanza.