Hari mu mukino w'umunsi wa 19 wa Shampiyona, mu mukino w'injyanamuntu Rayon Sports yatsinzemo mukeba w'ibihe byose APR FC igitego 1-0 kuri Stade ya Huye ku Cyumweru tariki 12 Gashyantare 2023.

Iki gitego cyatsinzwe na Ngendahimana Eric ku munota wa 34 w'umukino ku mupira yahawe n'Umunye-Congo Luvumbu Nzinga Héritier.

Ubwo umukino wari urangiye, abafana ba Rayon Sports bahamagaye Luvumbu wagize uruhare runini mu ntsinzi kugira ngo bamushimira bamuha amafaranga.

Ubwo yegeraga abafana Polisi y'Igihugu yari ishinzwe umutekano kuri Stade ifatanyije n'abakozi ba FERWAFA nabo bari bashinzwe umutekano ku mukino bamwigijeyo bamusaba gusubira mu bandi bakinnyi bari batangiye kwinjira mu rwambariro hirindwa ko yateza imvururu ku kibuga kubera umuvundo w'abafana bari batangiye kwegera uruzitiro ari benshi.

Uyu musore w'imyaka 30 yabanje guhatiriza ngo ahure n'abafana ba Rayon Sports ndetse bigera n'ubwo avugana nabi n'abashinzwe umutekano haba ku ruhande rwa Polisi na FERWAFA ariko birangira yemeye gusubira mu nzira imwerekeza mu rwambariro. Nubwo yasubiranyeyo akangononwa ariko yashimiraga abafana bamuzirikanye bakifuza kumushimira nyuma y'umukino.

Nyuma y'intsinzi Rayon Sports yagize amanota 36 ayishyira ku mwanya wa kane aho inganya na AS Kigali na Gasogi United, zose zirushwa na APR FC ya mbere inota rimwe.