Ubwo gahunda ya shampiyona y’u Rwanda ‘AZAM Rwanda Premier League 2018-19’ yasohokaga, umukino wa APR FC na Rayon Sports wari uteganyijwe kubera kuri Stade ya Kigali i Nyamirambo.

Mu gihe habura iminsi ibiri ngo uyu mukino uteganyijwe kuri uyu wa Gatatu ube, ikipe ya APR FC yamaze gusaba inemererwa na FERWAFA kwimura ikibuga umukino uzaberaho.

Umuvugizi w’iyi kipe y’Ingabo z’u Rwanda, Kazungu Claver, yabwiye IGIHE ati “Umukino wimuriwe kuri Stade Amahoro kuko hitezwe umubare munini w’abafana bazawitabira barenze abajya muri Stade ya Kigali. Ni umukino ukomeye kurusha indi mu Rwanda niyo mpamvu twahisemo kuwakirira kuri stade nkuru.”

Uyu mukino uteganyijwe saa kumi n’ebyiri z’umugoroba. Amakipe yombi azakina adafite inkingi za mwamba hagati mu kibuga kuko APR FC izakina na Rayon Sports idafite Buteera Andrew wagize ikibazo cy’imvune mu mukino ikipe ye yatsinzwemo 3-1 na Club Africain basezererwa muri CAF Champions League.

Rayon Sports yo izakina idafite Mugheni Fabrice wavunikiye mu mukino ikipe ye yatsinze AS Kigali 1-0 mu mpera z’iki cyumweru ariko izishimira kongera gukoresha Muhire Kevin wari umaze iminsi 15 mu Misiri mu igeragezwa biteganyijwe ko agaruka mu Rwanda mu ijoro ryo kuri uyu wa mbere tariki 10 Ukuboza 2018.

APR FC izakira umukino yatanze Rayon Sports gutangira umwiherero witabiriwe n’abakinnyi 20, naho mukeba wayo we azatangira umwiherero ku mugoroba wo kuri uyu wa kabiri.

Ibiciro byo kwinjira muri uyu mukino

– VVIP: 10,000 Frw
– VIP: 5,000 Frw
– Ahasakaye: 3,000 Frw
– Ahadasakaye: 2,000 Frw

Abakinnyi 20 APR FC yatangiranye umwiherero

Abanyezamu: Kimenyi Yves na Ntaribi Steven

Ba myugariro: Omborenga Fitina, Imanishimwe Emmanuel, Rugwiro Herve, Buregeya Prince, Ngabo Albert na Rusheshangoga Michel

Abakina hagati: Mugiraneza Jean Baptiste Migi, Nshimiyimana Amran, Nizeyimana Mirafa, Ntwari Evode, Itangisha Blaise na Sekamana Maxime
Ba rutahizamu: Nshuti Dominique Savio, Hakizimana Muhadjiri, Mugunga Yves, Isaa Bigirimana, Byiringiro Lague na Iranzi Jean Claude