Harabura ibyumweru bibiri amakipe yombi agahurira muri uyu mukino w’ishiraniro uteganyijwe ku wa Gatanu, tariki ya 16 Ukwakira 2026, kuri Stade Amahoro.

Ni umukino wahawe abasifuzi bakomeye, dore ko Abdou Abdel Mefire uzaba ari mu kibuga hagati ari we wabaye umusifuzi mwiza ukiri muto muri CHAN 2025

Uyu azungirizwa na Elvis Jay Noubou Ngoujo uzaba uri ku ruhande rumwe ndetse na Rodrigue Mini Mbli uzaba uri ku rundi ruhande. Umusifuzi wa kane ni Antoine Max Isuma.

CAF yashyizeho Umunya-Tanzania, Khalid Abdullah Mohammed, nka Komiseri w’umukino.

Umuyobozi ushinzwe Umupira w’Amaguru muri Zamalek SC, Abdel Nasser Mohamed, yavuze ko imyiteguro y’uyu mukino yatangiye, ndetse mu gihe gito bahaguruka mu i Cairo bagana i Kigali.

Ni urugendo bazatangira ku wa 12 Ukwakira, bakagera ku Kibuga Mpuzamahanga cy’Indege cya Kigali, mu gitondo cyo ku wa 13 Ukwakira 2026.

Nyuma y’umukino uzaba ku wa 16 Ukwakira, umukino wo kwishyura uzabera kuri Cairo International Stadium, ku wa 24 Ukwakira 2026.

APR FC yasezereye Les Aigle du Congo yo muri Repubulika Iharanira Demokarsi ya Congo (RDC) mu ijonjora rya mbere, mu gihe Zamalek SC yasezereye AS Port yo muri Djibouti.