Umunyezamu wa Mexique yatowe nk’umukinnyi mwiza ku mukino Brazil yaguye miswi Mexique nyuma yo gukuramo imipira igera kuri 19, aya makipe akaba asabwa kunganya imikino basigaranye akabona itike ya 1/8 cy’irangiza.

Mexique niyo yabanje kubona uburyo bukomeye ku munota wa 23 ku ishoti rikomeye rya Herrera ryakuwemo n’umunyezamu Julio Cesar.

Nyuma y’iminota ibiri, Neymar yabonye uburyo n’umutwe bwo gutsinda igitego cya gatatu muri iki gikombe ahagarikwa n’umunyezamu wa Mexique, Guillermo Ochoa kimwe nka Fred wagerageje amahirwe ku munota wa 35 kuri koroneri yatewe na Oscar.

Mbere yo kujya kuruhuka, Ocha yongeye guhagarika Abanyabrazil umutwe watewe na kapiteni wa Brazil, Thiago Silva.

Mu gice cya kabiri, umutoza wa Brazil, Luiz Scolari yakuyemo Ramires wari wabonye ikarita y’umuhondo hinjira Bernard.

Ku nshuro ya kabiri, Umunyamexique Vazquez yagerageje umunyezamu wa Brazil ku munota wa 54, nyuma y’iminota itatu yongera kugeragezwa Herrera.

Ku mupira wo guhana ikosa ryakorewe kuri metero 25 uvuye ku izamu rya Mexique, Neymar yawuteye unyuraho ku ruhande gato, Fred aha umwanya Jô, izina rigufi mu mateka y’igikombe cy’Isi.

Neymar yongeye kugerageza amahirwe ariko umupira yateye mu nguni y’izamu ukurwamo neza na Ochoa.

Oribe Peralta watsinze igitego ku mukino wa Cameroun yasimbuwe na Javier Hernández.Nyuma yo guhererekanya neza hagati ya Bernard na Jô umupira waruhukiye mu ntoki za Ochoa.

Habura iminota 3, kapiteni Thiago Silva yateye umutwe mu izamu rya Ochoa awukuramo n’akaboko k’ibiryo. Myugariro wa Real Madrid, Marcelo yaje kugushwa mu rubuga rwa Mexique ariko umusifuzi Cakir arabyirengagiza.

Jimenez yashoboraga kuraza nabi Abanyabrazil iyo umupira yateye utagarurwa na Julio Cesar.

Umunyezamu wa Mexique, Guillermo Ochoa yatowe nk’umukinnyi mwiza w’umukino nyuma yo gukuramo amashoti 19 yajyaga mu izamu rye naho Julio Cesar wa Brazil akuramo 12.

Nibura imipira 37 yageragejwe n’abakinnyi ba Brazil bashaka igitego naho Mexique itera 30.

Ni umukino wa kabiri mu 26 Brazil iheruka gukina mu gikombe cy’Isi bashoje badatsinze igitego, warebwe n’abantu 60342.

Brazil yari yaratsinze imikino 3 yabahuje na Mexique mu gikombe cy’Isi ku giteranyo cy’ibitego 11-0.

Ochoa yakuyemo ibitego 6 byabazwe anganya na M’bolhi wa Algeria ku mukino w’u Bubiligi, imipira myinshi ku mukino umwe muri iki gikombe.

Kuri uyu wa Gatatu, muri itsinda A, Cameroun yari yatsinzwe na Mexique irakina na Croatia yatsinzwe na Brazil saa 23.59. Brazil na Mexique bifite amanota 4 mu gihe andi atarabona na rimwe.

Uko byari byifashe mu yindi mijyi yo mu Brazil

[email protected]