Ntagwabira Jean Marie wabaye umutoza wa APR FC, Rayon Sports, Kiyovu Sports n’umutoza wungirije mu ikipe y’igihugu yakinnye igikombe cy’Afurika mu 2004 yapfuye mu gitondo cyo kuri uyu wa Kabiri tariki ya 3 Gashyantare 2015 azize indwara mu Bitaro bya Gisirikare i Kanombe.

Amakuru agera kuri IGIHE.com, Ntagwabira wari umuyobozi wa tekiniki muri Sunrise, ikipe y’Intara y’Iburasirazuba yari amaze iminsi mu bitaro bya Gisirikare i Kanombe kuva imikino isoza igice kibanza cya shampiyona.

Ntagwabira Jean Marie wari umuyobozi wa tekiniki muri Sunrise yitabye Imana mu Bitaro bya Gisirikare i Kanombe

Cpt Jean Marie Ntagwabira yatangiranye na APR FC ku Mulindi mu 1993

Nyuma yo kuva mu bihano yari amazemo imyaka ibiri aho yavuzweho kugura intsinzi (match fixing) ubwo yatozaga Kiyovu Sports yakinnye na Rayon Sports, tariki ya 28 Nyakanga 2014, Ntagwabira yagizwe umuyobozi wa tekiniki wa Sunrise ahabwa amasezerano y’imyaka ibiri.

Uyu mutoza apfuye hashize iminsi mike yakiriye agakiza maze abatizwa mu mazi magari. Akimara kubatizwa yavuze ko yiyemeje kwatura ibyaha bye byose ndetse akakira agakiza ku bwo kuwiyumvamo umuhamagaro w’Imana.

Ubusanzwe Ntagwabira yasengeraga mu idini rya Gatulika ariko yumvise umuhamagaro bityo ajya mu barokore yemera kubatizwa bwa kabiri.

Hari hashize ukwezi Jean Marie Ntagwabira abatijwe mu mazi magari

Nk’umutoza wa APR FC, Ntagabwira yagejeje iyi kipe ya gisirikare yakiniye kuva iri ku Mulindi muri ¼ cya CAF champions League, yabanje kunyagira Anseba S.C yo muri Eritrea ibitego 11-3, asezerera Zamalek yo mu Misiri ayitsinze ibitego 6-4 gusa nyuma yo kunganya na Africa Spots yo muri Cote d’Ivoire igitego 1-1 yasezerewe kuri penaliti.

Iyi niyo kipe yo mu Rwanda yageze kure mu mikino nyafurika.

Nyuma yo gutoza ATRACO FC mu 2008 agatwara igikombe cya shampiyona, Ntagwabira yabaye umutoza wa Kiyovu Sports mu 2009 ajya muri Rayon Sports yavuyemo mu 2012.

Ntagwabira afite umuhigo w’umutoza watwaye igikombe cya shampiyona mu makipe abiri, yatwaye ibikombe bitanu bya shampiyona ari muri APR FC (4) na ATRACO FC mu 2008.

Ntagwabira ybaye umutoza wungirije mu ikipe y'igihugu yakinnye igikombe cy'Afurika mu 2004 muri Tuniziya

Mu 2004, Ntagwabira Jean Marie yabaye umutoza wungirije Rotamir Djokovic wayoboye Amavubi mu gikombe cy’Afurika cya 2004 cyabereye muri Tuniziya.

Ntagwabira yabaye umutoza wungirije Multin Milutin Sredojević mu 2012.

Ubuyobozi bwa Sunrise bwahise busohora itangazo ryo gufata mu mugongo umuryango wa Ntagwabira Jean Marie wari ufite imyaka 41.