Ibi bihembo bitangwa hagendewe cyane ku majwi y’abatoza b’amakipe y’ibihugu, ba kapiteni b’amakipe y’ibihugu binyamuryango bya FIFA.

Mu ijoro ryo kuri uri uyu wa mbere ubwo hahembwaga abahize abandi muri 2017/2018, byagaragaye ko ku rutonde rw’abatoza n’aba kapiteni bavuye mu bihugu bisaga 200 batoye hatariho ab’u Rwanda.

Bitewe n’uko mu ikipe y’igihugu bihagaze ubu, Niyonzima Haruna yagombaga gutora nka kapiteni wayo. Gusa ku mutoza Mashami Vincent, igihe cyo gutora cyarangiye atarahabwa akazi.

Mu kiganiro na IGIHE, Mashami yagize ati “Buri mwaka bohereza uburyo bwo gutora n’abakinnyi bo gutorwamo uwitwaye neza kurusha abandi. Ariko nahawe akazi ko kuba umutoza mukuru w’Amavubi iyi gahunda yararangiye niyo mpamvu ntagaragara kuri uru rutonde rw’abatoye.”

Ababyemerewe basabwe gutora hagati ya tariki 24 Nyakanga na 10 Kanama 2018. Amakuru agera kuri IGIHE ni uko ubwo FIFA yasabaga ko abatora bohereza amahitamo yabo, kapiteni w’Amavubi Haruna Niyonzima atabikoze ku gihe.

Umunyarwanda rukumbi ugaragara kuri uru rutonde rw’abatoye mu bihembo bya FIFA ni Samuel Imanishimwe wa Kigali Today, watoye nk’umunyamakuru.

Mu Rwanda utora aba yemerewe guhitamo abakinnyi batatu mu bagabo n’abatoza batatu aha amahirwe. Uwo yanditse mbere ahabwa amanota atanu, uwo yanditse ku nshuro ya kabiri ahabwa amanota atatu naho uwa yanditse bwa gatatu ahabwa inota rimwe.

Amahitamo y’amwe mu mazina akomeye

Lionel Messi wa Argentina yatoye; 1. Modric Luka, 2. Mbappé Kylian, 3. Cristiano Ronaldo.

Ronaldo Cristiano wa Portugal yatoye; 1.Varane Raphael, 2. Modric Luka, 3.Griezmann Antoine

Kapiteni w’u Bufaransa bwatwaye igikombe cy'isi, Lloris Hugo, yatoye bene wabo; 1.Varane Raphael, 2.Griezmann Antoine, na 3. Mbappé Kylian

Ibihembo by’umukinnyi witwaye neza byegukanywe n’umunya-Croatia Luka Modrić ukinira Real Madrid mu bagabo na Marta Vieira da Silva, umunya-Brazil ukinira Orlando Pride yo muri Leta zunze ubumwe za Amerika.