Wari umukino warimo ishyaka ryinshi n’ubwo amakipe yombi nta yabashije kureba mu izamu ry’indi.

Ku munota wa 87 w’umukino Umutoza wa Rayon Sports, Yamen Zelfani wari uri ku gitutu ashaka ko ikipe ye yabona igitego, ubwo umupira wari uvuye muri ba myugariro ba Gorilla FC waje kumusanga aho yari ahagaze awusanganira agira ngo awugarure ikipe ye irengure, aba ari ho agirira imvune.

Igihe yageragezaga guhagarika umupira umukinnyi wa Gorilla FC, Umunya-Nigeria, Adeshola yamukandagiye ku kagombambari k’iburyo aryama hasi asaba ubutabazi. Hashize akanya gato yahagurutse acumbagira asubira ku ntebe y’abasimbura ajya kwitabwaho n’abaganga.

Adeshola na we yahise aryama hasi by’urwiyererutso nyuma y’akanya gato arahaguruka umukino urakomeza.

Ikipe y’abaganga ba Rayon Sports iyobowe na Mugemana Charles yakuyemo inkweto za Yamen Zelfani maze bamushyiraho barafu. Nyuma gato yo kuyimushyiraho yutse inabi ushinzwe gufata amashusho ya Televiziyo y’Igihugu, RBA waje kumufata amashusho ibintu atifuzaga. Yakomeje gukurikira umukino yicaye ku ntebe arambitse ukuguru kw’iburyo ku muganga w’Ikipe.

Nyuma y’umukino, abaganga bamuhambiriye bande ku kuguru kwagize ikibazo nyuma gato akomereza ku gice kidatwikiriye afatanya n’abakinnyi be gushimira abafana baje gushyigikira Rayon Sports ubwo yanganyaga na Gorilla FC.

Uko umukino wagenze

Gorilla FC ni yo yatangiye neza umukino wayobowe na Ngabonziza Jean Claude kuko ku munota wa kane gusa rutahizamu Adeaga Adeshora yahushije uburyo bwa mbere bw’igitego ku ishoti yatereye inyuma y'urubuga rw'amahina, umupira uca hafi gato y’izamu.

Nyuma y’iminota 15, Charles Bbaale yacomekeye umupira Youssef Rharb washatse gucenga umunyezamu wa Gorilla FC, Matumele Arnold, ariko umusifuzi yemeza ko habayeho kurarira.

Umukino wari umaze gushyuha, Adeaga Adeshora yongera kubangamira ubwugarizi bwa Rayon Sports ari kumwe na mugenzi we Bobo Mohamed wakorewe ikosa, ryahanwe ariko umunyezamu Hakizimana Adolphe awushyira muri koruneri.

Kuva icyo gihe habaye amakimbirane hagati y’abatoza babiri, uwa Rayon Sports Zelfani n'uwa Gorilla FC Gatera Moussa bateranye amagambo, aho uyu Munya-Tunisia yashinjaga ikipe bahanganye kuvuna abakinnyi be.

Uku gushyamirana kwakomeje ndetse birangira umusifuzi wa kane abyinjiyemo ahamagara uwo hagati, Ngabonziza wahise yereka ikarita y’umuhondo Zelfani abona gutuza, hari ku munota wa 32.

Rayon Sports yashoboraga kubona igitego mu mpera z’igice cya mbere giturutse ku ryakorewe Joackiam Ojera rigahanwa na Mvuyekure Emmanuel ariko Rwatubyaye Abdul agiye gushyiraho umutwe asifurwa ko yaraririye.

Igice cya mbere cyarangiye ari 0-0 ndetse icya kabiri Umutoza Yamen Zelfani, yagitangiranye impinduka aho Youssef Rharb na Serumogo Ali basimbuwe na Mucyo Didier na Kalisa Rashid.

Ku munota wa 60, Ojera yasize ba myugariro ba Gorilla FC bayobowe na Duru Mercy, agiye gushyira umupira mu izamu ushyirwa muri koruneri n'Umunyezamu Matumele Mozombo Arnold.

Ubundi buryo Murera yabonye ni aho Mvuyekure Emmanuel yateye coup-franc yari hafi y'izamu, ariko ahereje Luvumbu agwa mu rubuga rw'amahina, umusifuzi arabyihorera mu gihe benshi bari ku kibuga bakekaga ko ari penaliti.

Uburyo bumwe bukomeye ni bwo Gorilla FC yabonye mu gice cya kabiri aho Iradukunda Siméon yateye ishoti rikomeye ku izamu ariko myugariro Rwatubyaye Abdul araryama awukuraho.

Uyu mukino rukumbi wabaye kuri uyu munsi warangiye amakipe yombi agabanye amanota, Rayon Sports igira ane kuko yatsinze umukino wa mbere, n'aho Gorilla FC igira abiri kuko yanganyije umukino ubanza na Etincelles.

Amafoto: Uko byagenze kugira ngo Zelfani avunike

Amafoto: Ntare Julius

Video: Mazimpaka Alain