Pépinière yageze ku mukino wa nyuma w’icyiciro cya kabiri nta mukino n’umwe itsinzwe, kuri iki Cyumweru yatwaye igikombe itsinze Kirehe kuri penaliti 4-3 nyuma y’uko amakipe yombi yarangije anganya ibitego 2-2 mu minota 90 y’umukino.

Kirehe FC yatsindiwe na Bizimungu Jean Pierre bita Kamoja na Sinagaye Elvis mu gihe Pépinière yatsindiwe na Rongaronga Prince na Mungarakarama washyizemo icya kabiri mu minota ya nyuma, umukino urangira ari ibitego 2-2.

Bagiye muri penaliti, Kirehe FC yahushije eshatu Pépinière ihusha ebyiri ihita yegukana igikombe na miliyoni imwe y’amafaranga y’u Rwanda naho Kirehe FC ihabwa ibihumbi 500.

Nyuma yo kuzamura no guhesha iyi kipe y’i Muhanga igikombe, umutoza Muhoza Jean Paul yatangaje ko nubwo ageze ku ntego ze n’inzozi yari afite ariko ngo icyizere cyo gukomezanya nayo mu cyiciro cya mbere nta gihari.

Yagize ati “Byaba byiza kuri njye ariko na none bibaye ngombwa ko ngenda nk’umutoza ukiri na muto, aka ni akazi nkora ngakunze, najya n’ahandi ngakora ariko nibaramuka bangiriye icyizere nzakora akazi kanjye kandi neza.”

Pépinière yazamutse mu cyiciro cya mbere ishobora guhita yivanga na AS Muhanga itozwa na Abdou Mbarushimana yamaze kumanuka mu cyiciro cya kabiri zigakora ikipe imwe ishobora guhabwa izina rya Muhanga FC ikaba ariyo izakina Azam Rwanda Premier League umwaka utaha.