Emery yari agifite amasezerano mu ikipe ya Villarreal yo muri Espagne, bituma Aston Villa iyishyura miliyoni 5.2 z’amayero. Azatangirana n’ikipe nshya ku wa 1 Ugushyingo 2022.

Aaron Danks wari umutoza w’umusigire azakomezanya na Aston Villa mu mpera z’iki cyumweru ikina na Newcastle. Uyu yagumanye ikipe nyuma y’uko Gerrard yirukanywe mu cyumweru gishize, amaze gutsindwa na Fulham ibitego 3-0.

Ubuyobozi bwa Aston Villa bubinyujije ku mbuga nkoranyambaga, bwavuze iyi kipe yamaze kumvikana na Unai Emery ku masezerano yari asigaranye muri Villa Real.

Buti "Aston Villa yishimiye kandi gutangaza ishyirwaho rya Unai Emery nk’umutoza mushya wayo. Uyu mutoza udafite amasezerano yo gukomezanya na Villarreal mu mpeshyi itaha, azatangira akazi mu ikipe yacu mu cyumweru gitaha. Azagatangira nyuma y’uko ibyangombwa bimwemere gukorera inaha zimaze kuboneka.”

Unai Emery ni umutoza ufite uburambe, kuko amaze gutoza imikino irenga 900. Ikindi cyatumye Aston Villa imuhitamo ni uko yigeze no kuba muri shampiyona y’icyiciro cya mbere mu Bwongereza ubwo yatozaga Arsenal FC.

Yegukanye ibikombe bitatu bya Europa League byikurikiranya hagati ya 2013 na 2016 mbere yuko ajya gutwara shampiyona y’u Bufaransa (Ligue 1) muri Paris-Saint Germain.

Emery yinjiye muri Villarreal muri 2020 maze ayitoza no muri Europa League ayigeza ku mukino wa nyuma, atwara n’igikombe muri 2020-2021 atsinze Manchester United ku mukino wa nyuma.

Gahunda ya Villarreal na Unai Emery yakurikiye iyirukanwa rye muri Arsenal mu Ugushyingo 2019.

Ni mu gihe yari amaze kunanirwa gutsinda imikino irindwi yose. Mu gihe yamaranye na Arsenal ariko yayigejeje ku mukino wa nyuma wa Europa League, atsindwa na Chelsea muri 2019.

Ku cyumweru gishize Aston Villa yatsinze Brentford ibitego 4-0 iri gutozwa na Danks w’umusigire. Iyi yari intsinzi yayo ya gatatu mu mikino 12 ya shampiyona imaze gukina, ubu iri ku mwanya wa 15 n’amanota 12.

Unai Emery yagizwe umutoza mushya wa Aston Villa