Uruguay yarangije ku mwanya wa kane mu gikombe cy’Isi 2010 yatunguwe na Costa Rica itsindwa ibitego 3-1, Colombia idafite rutahizamu Radamel Falcao itsinda u Bugereki ibitego 3-0.

Uruguay 1-3 Costa Rica

Mbere y’uko uyu mukino byemejwe ko rutahizamu wa Liverpool, Luis Suarez adakina nubwo yagaragaye ku ntebe y’abasimbura. Edinson Cavani na Diego Forlan bari muri 11 babanje mu kibuga guhanga na Costa Rica.

Ku munota wa 24, ku ikosa Junior Diaz yakoreye kuri Diego Lugano Cavani yinjije neza penaliti, igice cya mbere kirangira Uruguay yatsindiwe ku mukino wo gushaka umwanya wa gatatu n’u Budage mu 2010 ifite igitego 1-0.

Rutahazamu wa Arsenal watijwe muri Olympiacos yo mu Bugereki, Joel Campbel yafunguye amazamu ya Uruguay ku munota wa 54, cyakurikiwe n’icya Duarte nyuma y’iminota itatu gusa.

Ku munota wa 84, Costa Rica yakinnye neza umupira wari utakajwe na Uruguay maze Campbel ahereza Urena wari umaze umunota yinjiye mu kibuga asimbuye, icya gatatu kiba kiranyoye.

Maximiliano Perreira wa Urguay yakoreye ikosa kuri Campbel ahabwa ikarita y’umutuku, ya mbere muri iki gikombe cy’Isi kiri gukinwa ku nshuro ya 20.

Mu mikino 9 yahuje aya makipe, ni ubwa mbere Uruguay itsindwa na Costa Rica nubwo banganyije imikino ibiri.

Uyu ubaye umukino wa kabiri utunguranye nyuma y’ibitego 5-1 u Buholande bwatsinze Espagne. Nyuma y’imikino 6, nta makipe aranganya mu gihe hamaze gutsindwa ibitego 22.

Gutsindwa na Costa Rica byongereye akazi kuri Uruguay isabwa gutsinda u Bwongereza n’u Butariyani ngo yizere kubona itike ya 1/8 cy’irangiza. Ni ku nshuro ya mbere, Costa Rica itsinze igitego kirenze kimwe mu gikombe cy’Isi.

Uruguay imaze gukina ikmikino 6 ifungura igikombe cy’Isi idatsinda, iheruka intsinzi ku mukino wa mbere mu 1970.

Colombia 3-0 u Bugereki

Colombia idafite rutahizamu wayo ukinira Monaco mu Bufaransa, Radamel Falcao yamaze gutaha nyuma yo kugaragara ko atazakira imvune yagize muri Mutarama 2014.

Ku munota wa 5, Pablo Armero yatsinze Abagereki igitego ku burangare bwa ba myugariro.

Teofilo Gutierrez yaje gutsinda igitego cya kabiri ku munota wa 58 naho Rodriguez atsinda agashinguracumu ku munota wa 3 w’inyongera (90+3).

Mu bikombe bitatu by’Isi, u Bugeriki bwakinnye bwatsinzwe igitego mu minota 7 ku mukino ubanza.

Colombia iyoboye itsinda C ikurikiwe na Cote d’ivoir, u Buyapani n’u Bugereki ntibarabona inota.

[email protected]