Ni nyuma y’uko iyi kipe yambara ubururu n’umweru inaniwe gutsinda Gorilla FC zanganyije igitego 1-1 ku mugoroba wo ku wa Gatanu, tariki ya 15 Gicurasi 2026, mu mukino w’Umunsi wa 32 wa BK Pro League.

Uyu mukino wasize Gikundiro igize amanota 52 ku mwanya wa kabiri mu makipe yo mu Rwanda, yikura ku Gikombe cya Shampiyona bidasubirwaho ndetse yongerera amahirwe mukeba wayo w’ibihe byose, Kiyovu Sports iyiri inyuma gato kuko yo ifite amanota 50 mbere yo gukina na AS Muhanga kuri uyu wa Gatandatu.

Rayon Sports yateze umutego, aba ari yo ushibukana

Umukino wo ku wa Gatanu wari uwa kane uhuje Rayon Sports na Gorilla FC muri uyu mwaka w’imikino, ndetse wari uwa gatatu uhuje amakipe yombi mu gihe gito, nyuma y’uko Gikundiro yasezereye iyi kipe bamwe bahoze bavuga ko ari murumuna wayo mu Gikombe cy’Amahoro mu buryo bugoranye.

Gorilla FC nta sano yagaragaje mu mikino yose yayihuje na Rayon Sports ndetse intsinzi y’ibitego 2-1 Gikundiro yabonye mu mikino ibanza, yaturutse ku buhanga bwa Ndayishimiye Richard wateye coup-franc nziza mu gice cya kabiri.

Gusezerera iyi kipe itozwa na Kirasa Alain mu buryo bugoranye, hitabajwe igitego cyo hanze, muri ½ cy’Igikombe cy’Amahoro, byacaga amarenga ko umukino wo ku wa Gatanu utaza koroha ku mpande zombi, cyane kuri Rayon Sports yari ifite icyo iharanira.

Gusa ibyo birasa n’aho ntaho byari bihuriye n’ibyo Haringingo Francis yatekereza kuko mu bakinnyi yitabaje i Nyamirambo, yari yakoze impinduka eshanu ugereranyije n’abari babanje mu kibuga ahura n’iyi Gorilla FC mu Gikombe cy’Amahoro. Ibi bamwe babihuje no gutekereza umukino wa nyuma w’Igikombe cy’Amahoro azahuramo na APR FC ku wa Gatandatu utaha.

Kwizera Olivier, Youssou Diagne na Ndikumana Asman ntibagaragaye mu bari ku rupapuro rw’umukino mu gihe Ishimwe Ganijuru Elie na Tambwe Gloire Ngongo babanje ku ntebe y’abasimbura nk’uko byagenze kuri Aziz Bassane wongeye kubabarirwa nyuma y’uko yari yahagaritswe mu ntangiriro z’iki cyumweru kubera kutitabira imyitozo mbere yo guhura na Marine FC mu mpera z’icyumweru gishize.

Rayon Sports yihariye umukino ku kigero cya 55%, yabonye uburyo bwinshi bwashoboraga kwica umukino mu gice cya mbere cyayobowe na Gorilla FC ibikesha igitego cya Rutonesha Hesbone, ariko abarimo Mugisha Didier, Tony Kitoga na Habimana Yves, bose bananirwa kubyaza umusaruro amahirwe babonye.

Byasabye gutegereza umunota wa 82, Rayon Sports ibona igitego cyo kwishyura cyinjijwe na Bigirimana Abedi, ku mupira wahinduwe na Ishimwe Ganijuru Elie wari wajyanye mu kibuga na Tambwe Gloire na Aziz Bassane igice cya kabiri kigitangira.

Nubwo hari abitereye mu bicu iki gitego kikijyamo, iminota yari isigaye n’indi itanu yongereweho, yose yarangiye ntawe umwenyura, ahubwo bamwe batangira kuvugira mu matamatama no kugaragaza ko batishimiye uburyo bakinnye.

Rayon Sports ishobora gutakaza umwanya wa kabiri muri Shampiyona mu gihe wari kuzayihesha gusohoka niramuka idatwaye Igikombe cy'Amahoro

Kwizera Olivier (hagati) ntiyakinnye umukino wa Gorilla FC nyuma yo kugira ikibazo cy'iryinyo mu ijoro ribanziriza umukino

Haringingo avuga ko nta bisubizo yari afite

Mu gihe abafana barubiye, gutsindwa babyegetse ku mahitamo y’umutoza wabo Haringingo Francis, we avuga ko umukino bawukinnye uko bari babiteguye.

Ati “Navuga ko dukoze ikosa [...]. Uyu mukino twawukinnye uko twagombaga kuwukina, ahubwo barebe amahirwe tutabashije kubyaza umusaruro. Impinduka zabaye, ntabwo twakoze impinduka kugira ngo turuhutse aba, twakoze impinduka kuko twari dutegetswe kuzikora.”

Uyu mutoza w’Umurundi yavuze ko hari abakinnyi bari bafite ibibazo bitandukanye byatumye batagaragara ku mukino, abandi bikaba ngombwa ko basimbura.

Ati "Tambwe yarambwiye ngo ndananiwe cyane, nduhutsa nkine igice cya kabiri. Elie yari afite ikibazo cy’imitsi no ku mukino uheruka twari twishyize mu byago byo kumubanzamo."

Ku munyezamu Kwizera Olivier, we yavuze ko yagize ikibazo cy’iryinyo ryamuriye mu ijoro ribanziriza umukino, abaganga bagerageza kurihoma biragorana kugeza umukino ugeze banzura ko atawukina.

Haringingo yongeyeho ati “Akazi k’umutoza ni ukurema, noneho ubuhanga bw’abakinnyi bugakora ibindi. Aha tugeze ni ukongera gukora cyane kugira ngo tubone amahirwe menshi, dushake ayo twabyaza umusaruro. Mu gihe gito maranye na Rayon Sports, nashoboye gukora byinshi. Ni ukubagirira icyizere.”

Ku rundi ruhande, Umutoza wa Gorilla FC, Kirasa Alain, wemeje ko azakomezanya n’iyi kipe, we yavuze ko umukino bari bawufite mu biganza ariko birangaraho.

Ati “Mbere na mbere ntabwo twishimye, turababaye, uyu mukino twari tuwufite ukurikije uko byari bimeze. Uko twakinnye igice cya mbere byari bitandukanye n’uko twakinnye igice cya kabiri. Twagombaga kujya kuruhuka dufite ibitego bibiri cyangwa bitatu.”

Umutoza wa Rayon Sports, Haringingo Francis, yavuze ko nta yandi mahitamo yari afite mu guhitamo ikipe akinisha kuri Gorilla FC

Kirasa Alain utoza Gorilla FC, ntiyanyuzwe no kunganya na Rayon Sports yamwishyuye mu minota ya nyuma

Rayon Sports yishyize mu byago bishobora gutuma idakina CAF Confederation Cup ya 2026/27

APR FC irabura inota rimwe gusa mu mikino itatu izahuramo na Rutsiro FC, ikipe ya kabiri ya Al-Merrikh SC na Gicumbi FC kugira ngo yizere kwegukana Shampiyona ku nshuro ya karindwi yikurikiranya no guhagararira u Rwanda muri CAF Champions League ya 2026/27.

Ku rundi ruhande, mu gihe Kiyovu Sports yatsinda imikino ibiri iri imbere izahuramo na AS Muhanga (kuri uyu wa Gatandatu) na Police FC, izaba irusha Rayon Sports inota rimwe mbere y’uko zihurira ku munsi wa nyuma wa Shampiyona.

Amahirwe y’iyi kipe yambara icyatsi n’umweru ku gikombe ni make, ariko kuba yabona umwanya wa kabiri ni ibintu bishoboka cyane mu gihe yaba ibashije gusoreza imbere ya Rayon Sports ndetse ni yo yazasohokera igihugu mu gihe APR FC yakwegukana Igikombe cy’Amahoro.

Abajijwe niba umukino azahuramo na Kiyovu Sports yahozemo utazaba ukomeye kuri we, Haringingo yagaragaje ko icyo atekereza cyane ari umukino wa nyuma w’Igikombe cy’Amahoro uzamuhuza na APR FC mu cyumweru gitaha.

Ati “Nibaza ko ubu umukino ukomeye dufite ni ukurikira, ni uwa nyuma w’igikombe tugomba gukora ibishoboka byose tukagitwara. N’imikino ikurikira yose irakomeye, irimo uw’ingenzi wa Kiyovu. Ndayizi, na bo baranzi, hari ibyahindutse kuva ngiye, ariko uzaba ari umukino ukomeye. Ubu ikituraje ishinga ni umukino wo ku wa Gatandatu kuko twazagera icyo gihe hari amahirwe twamaze kwibikaho yo gusohokera u Rwanda.”

Mbere yo guhura na Kiyovu Sports muri Shampiyona, Rayon Sports izakira Bugesera FC yayitsinze ibitego 2-1 mu mikino ibanza ndetse ikaba ari na yo yayikuye ku gikombe cya Shampiyona ya 2024/25.

Mu mikino ine ihuje Rayon Sports na Gorilla FC muri uyu mwaka w'imikino, amakipe yombi yanganyijemo itatu, undi urangira Gikundiro itsinze ibitego 2-1

Ishimwe Ganijuru Elie yagiye mu kibuga asimbuye mu gice cya kabiri kubera ikibazo cy'imitsi amaze iminsi akinana

Tambwe Gloire yari yabwiye Haringingo Francis ko ananiwe cyane, amusaba gukina igice cya kabiri

Amafoto: Umwari Sandrine

Video: Ndacyayisenga Emmanuel