Rooney n'ubwo yari afite amasezerano y'imyaka itatu n'igice, yasezerewe nyuma y'iminsi 83 gusa aho yasanze iyi Kipe yambara ubururu n'umweru ku mwanya wa gatandatu muri Shampiyona y'Icyiciro cya Kabiri mu Bwongereza, Championship.

Yasimbuye Umutoza John Eustace tariki 11 Nzeri 2023, nyuma y'uko Umuherwe Tom Wagner n'Ikompanyi ye Knighthead Capital Management Group bari bamaze kwegukana Birmingham City.

Birmingham City yatozwaga na Rooney mu mikino 15 yakinnye yatsinzwemo icyenda, inganya ine itsinda ibiri gusa, ikaba iri ku mwanya wa 20 ari na wo wa nyuma ku rutonde.

Icyasembuye abaherwe na Birmingham City kwirukana Rooney ni umukino yatsinzwemo na Reeds United ibitego 3-0 tariki ya 1 Mutarama 2024.

Nyuma yo kwirukanwa kwa Rooney, Umuyobozi Mukuru wa Birmingham City yagize ati "Turi gukora ibishoboka byose ngo tugarure Birmingham City mu bihe by'intsinzi iwacu kuri St. Andrews."

"Tubabajwe n'uko ibihe byacu na Rooney bitagenze uko twari twarabigennye ari na yo mpamvu twahisemo gufata ikindi kerekezo."

Wayne Rooney afite agahigo ko kuba ari we watsindiye Manchester United ibitego byinshi mu mateka yayo bingana na 253 aho akurikirwa na Sir Bob Charlton winjije ibitego 249.

Mu Ikipe y'Igihugu y'u Bwongereza, Rooney aza ku mwanya wa kabiri mu bayikiniye imikino myinshi ingana na 120 aho akurikira Peter Leslie Shilton na 125 mu gihe aza ku mwanya wa kabiri mu bamaze kuyitsindira ibitego byinshi bingana na 53 inyuma ya Harry Kane umaze kwinjiza 62.

Nyuma yo guhagarika ruhago mu 2021, Rooney yatangiriye umwuga we w'ubutoza muri Derby County, akomereza muri DC United na Birmingham City ari na yo batandukanye uyu munsi.