Nk’uko bisanzwe, mbere y’uko iri rushanwa ritangira tunyura mu matsinda yose tukarebera hamwe byinshi ku makipe ayagize, ari na yo mpamvu tugiye kurebera hamwe ibyo kumenya ku makipe y’ibihugu ari mu Itsinda E.

Itsinda E ririmo u Budage nk’ikipe ifite amahirwe yo kuryitwaramo neza kurusha andi, hakabamo Côte d’Ivoire iri mu makipe meza ahagarariye Afurika mu Gikombe cy’Isi na Curaçao igiye kurikina bwa mbere.

Imikino itandatu yo muri iri tsinda izabera mu mijyi itatu yo muri Leta Zunze Ubumwe za Amerika. Iyo ni Houston, Philadelphia, Kansas City na East Rutherford, hamwe n’undi wa Toronto muri Canada.

U Budage

Ikipe y’Igihugu y’u Budage ‘Die Mannschaft’, igiye kwitabira Igikombe cy’Isi ku nshuro ya 19 yikurikiranya, ikaba iya 21 mu mateka yayo. Inshuro itarikinnye ni mu 1930 kubera ibibazo by’amikoro, no mu 1950 kubera ibihano byaturutse ku Ntambara ya Kabiri y’Isi.

Ubwo iheruka muri iri rushanwa mu 2022 ntabwo yitwaye neza kuko yari imwe mu makipe ashyigikiwe na benshi ariko isezererwa mu matsinda. Gusa nubwo bimeze bityo yegukanye Igikombe cy’Isi inshuro enye (1954, 1974, 1990, 2014).

Die Mannschaft iri ku mwanya wa 10 ku rutonde rw’Ishyirahamwe rya Ruhago ku Isi (FIFA), itozwa na Julian Nagelsmann wahisemo gukoresha abakinnyi biganjemo abo mu gihugu imbere nk’uko bisanzwe.

Abo barimo umunyezamu wa Bayern Munich, Manuel Neuer ugiye gukina iri rushanwa ku nshuro ya gatanu, na bagenzi be Joshua Kimmich, Jonathan Tah, Jamal Musiala, Leon Goretzka, Alexander Pavlovic na Lennart Karl.

Hari kandi Florian Wirtz wa Liverpool, Antonio Rüdiger wa Real Madrid, Kai Havertz wa Arsenal, Leroy Sané wa Galatasaray, Malick Thiaw wa Newcastle United n’abandi.

Iyi kipe imaze gukina imikino 112 mu Gikombe cy’Isi. Aha harimo 68 yatsinze, 21 yanganyije na 23 yatsinzwe. Ubusatirizi bwayo bukunze kuyitwara muri iri rushanwa bwatumye imaze kwinjiza ibitego 232, naho yo yinjizwa 130.

Ikipe y’Igihugu ya u Budage iheruka Igiokombe cy'Isi mu 2014

Côte d’Ivoire

Ikipe y’Igihugu ya Côte d’Ivoire ‘Les Éléphants’, igiye kwitabira Igikombe cy’Isi ku nshuro ya kane. Inshuro ya mbere yakinnye iri rushanwa ni mu 2006, ikurkizaho mu 2010 na 2014 ari na bwo yagiherukagamo.

Kuva yatangira gukina iri rushanwa nta na rimwe irarenga amatsinda, ari na yo mateka ishaka kwandika ifatanyije n’Umutoza wayo Emerse Faé wayihesheje Igikombe cya Afurika mu 2024.

Les Éléphants iri ku mwanya wa 33 ku rutonde rw’Ishyirahamwe rya Ruhago ku Isi (FIFA), ni imwe mu makipe yo muri Afurika hanzwe amaso, kuko irimo bamwe mu bakinnyi bayifasha kwitwara neza.

Muri abo bakinnyi harimo Evan Ndicka wa AS Roma, Wilfried Singo wa Galatasaray, Seko Fofana wa Porto, Ibrahim Sangaré wa Nottingham Forest, Simon Adingra wa AS Monaco, Amad Diallo wa Manchester United, Evann Guessand wa Aston Villa, Yan Diomande wa RB Leipzig n’abandi.

Mu mikino icyenda yakinnye yatsinzemo itatu, inganya umwe, indi itanu irayitsindwa. Yinjije ibitego 13 yinjizwa 14.

Ikipe y'Igihugu ya Côte d'Ivoire ifite amahirwe yo kurenga amatsinda y'Igikombe cy'Isi bwa mbere

Équateur

Ikipe y’Igihugu ya Équateur ‘La Tri’, igiye kwitabira Igikombe cy’Isi ku nshuro ya gatanu kuva mu 2002, ikaba iya kabiri yikurikikiranya igiye kugikina, nyuma yo kubikora mu 2002 no mu 2006.

Ubwo iheruka muri iri rushanwa mu 2022 ubwo ryari ryabereye muri Qatar, yaviriyemo mu matsinda, gusa mu mateka yayo kure yageze akaba ari muro ⅛, mu 2006.

La Tri iri ku mwanya wa 23 ku rutonde rw’Ishyirahamwe rya Ruhago ku Isi (FIFA), itozwa n’Umunya-Argentine, Sebastián Andrés Beccacece, wahisemo intwaro ze zose z’abakinnyi ashaka ko bazamufasha.

Muri abo bakinnyi harimo Willian Pacho wa Paris Saint-Germain, Moisés Caicedo wa Chelsea, Piero Hincapié wa Arsenal, Pervis Estupiñán wa AC Milan, Nilson Angulo wa Sunderland n’abandi biganjemo abakina imbere mu gihugu muri Équateur.

Mu mikino 13 imaze gukina mu Gikombe cy’Isi, yatsinzemo itanu, inganya ibiri, mu gihe indi itandatu yayitsinzwe. Yinjijwe ibitego 14 na yo aba ari byo yinjiza.

La Tri igiye gukina Igikombe cy'Isi iri ku mwanya wa 23 ku rutonde rwa FIFA

Curaçao

Ikipe y’Igihugu ya Curaçao ‘The Blue Wave’, igiye kwitabira Igikombe cy’Isi ku nshuro ya mbere, akaba ari amateka yanditse nyuma yo kwitwara neza mu mikino y’amajonjora muri CONCACAF.

Icyo gihe bafashijwe n’Umutoza Dick Advocaat, bayobora Itsinda B muri CONCACAF, aho bari barisangiye na Jamaica, Trinidad and Tobago na Bermuda.

Andi makipe yitabiriye bwa mbere iri rushanwa ni Cape Verde, Jordanie na Uzbekistan.

Mu kurushaho kwandika amateka, The Blue Wave yahamagaye abakinnyi bakomeye barimo Juninho Bacuna wafashije iyi kipe kugera muri iri rushanwa aremye uburyo bw’ibitego bugera kuri 20, dore ko yanyuze mu makipe akomeye arimo Birmingham City, Huddersfield Town na Rangers.

Hari kandi mukuru we bakinana ari we Leandro Bacuna, ufite ubuhanga mu mupira w’amaguru kuko yanyuze mu makipe yo mu Bwongereza ari yo Cardiff City na Aston Villa.

Undi mukinnyi iyi kipe igenderaho ni Tahith Chong wanyuze mu ishuri ry’umupira w’amaguru rya Manchester United, akaba na we mukinnyi wenyine muri 26 bahamagawe wavukiye muri Curaçao.

Uko amakipe azahura:

14 Kamena

U Budage vs Curaçao
Côte d’Ivoire vs Équateur

20 Kamena

U Budage vs Côte d’Ivoire
Équateur vs Curaçao

25 Kamena

Curaçao vs Côte d’Ivoire
Équateur vs U Budage

Ikipe y'Igihugu ya Curaçao igiye gukina Igikombe cy'Isi bwa mbere

Abakinnyi u Budage buzifashisha mu Gikombe cy'Isi cya 2026

Abakinnyi bahamagawe mu Ikipe y'Igihugu ya Curaçao

Ikipe y'Igihugu ya Côte d'Ivoire yitabaje abakinnyi bayo bose bakomeye