Wenger yakuyeho igisuzuguriro atsinda Mourinho atwara Community Shield

00:00:00 IGIHE NETWORK

KINYARWANDA

ENGLISH

FRANCAIS

Wenger yakuyeho igisuzuguriro atsinda Mourinho atwara Community Shield

Yanditswe na

Tity Thierry Kayishema

Kuya 3 August 2015 saa 08:13

Yasuwe :

Yavuzweho:

Arsenal yisubije igikombe cya Community Shield cyo mu Bwongereza batsinze Chelsea ya Jose Mourinho igitego 1-0 cya Alex Oxlade-Chamberlain, umukino wa mbere Wenger amutsinze muri 13 bakinnye.

Community Shield ya 2015 yahuzaga Chelsea yatwaye shampiyona na Arsenal ifite FA cup, wari umukino wa mbere uzwi ku munyezamu Petr Cech wahoze akinira Chelsea.

Ku munota wa 24, Alex Oxlade-Chamberlain yatsindiye Arsenal igitego ku mupira yari ahawe na Theo Walcott wakinishwaga nka rutahizamu.

Ni igitego cya mbere Arsenal itsinze Chelsea mu minota 506, bari bamaze imikino umunani ikurikirana badatsinda.

Chelsea yakoresheje imbaraga nyinshi ishaka kugombora iki gitego nk’aho umupira Loic Remy yahaye Ramires atawuboneje neza mu izamu rya Cech.

Andi mahirwe akomeye ni umupira watewe na Oscar ahana ikosa ku munota wa 68 ukurwamo n’umunyezamu wa Arsenal, akazi gakomeye Cech yari abonye kuva umukino utangiye.

Umutoza wa Arsenal, Arsene Wenger yanze gusuhuza uwa Chelsea Jose Mourinho nyuma y’amagambo uyu yavuze muri Gashyantare 2014 ko Wenger ari umuhanga mu gutsindwa.

Mbere y’uko shampiyona itangira kuri uyu wa Gatandatu, Arsenal bavuye mu mikino itegura shampiyona bayitsinze yose, itanu n’ibitego 14 mu gihe Chelsea yakinnye ine ntiyabona intsinzi inganya ibiri.

Arsenal yasoje umwaka w’imikino itsinze imikino 20 kuri 27 yiyongereyemo umunyezamu Petr Cech mu gihe Chelsea yaguze Radamel Falcao igurisha Felipe Luiz na Didier Drogba ajya muri Canada naho Diego Costa wabatsindiye ibitego byinshi yari hanze kubera imvune.

Nyuma y’umukino Mourinho yavuze ko ikipe nziza yatsinzwe kuko Arsenal yugarishije abakinnyi 10 babyitwaramo neza.