Stade Umuganda yari yuzuye abafana biganjemo abambaye ubururu n’umweru baturutse mu Mujyi wa Kigali, yakiriye umukino w’umunsi wa 15 wa shampiyona y’u Rwanda ‘AZAM Rwanda Premier League’ wahuje Marines FC na Rayon Sports.

Wari umukino ikipe ya Rayon Sports yakinnye isezera ku mukinnyi wayo wo hagati Yannick Mukunzi uzahaguruka i Kigali ku wa Gatatu tariki 23 Mutarama 2019 ajya muri Sandviken IF yo mu cyiciro cya gatatu muri Suède biteganyijwe ko azasinyira amasezerano y’umwaka umwe.

Igice cya mbere cy’uyu mukino cyarangiye ari ubusa ku busa ku mpande zombi, abafana bategereza umunota wa 68 ngo haboneke igitego cya mbere cyatsinzwe na Niyonzima Olivier Sefu.

Ni nyuma y’akazi gakomeye kakozwe na ba rutahizamu bari mu bihe byiza; Bimenyimana Bonfils Caleb na Michael Sarpong bagerageje gutera mu izamu ariko umunyezamu Ahishakiye Hertier urindira Marines FC akomeza gutabara, umupira usanga Niyonzima Olivier Sefu ahagaze wenyine awinjiza mu izamu agaramye mu buryo bwa ‘Garrincha’.

Ku munota wa 81 Sefu wigaragaje cyane muri uyu mukino yongeye kuzamukana umupira hagati mu kibuga agera mu rubuga rw’amahina akorerwa ikosa n’umunyezamu wa Marines FC, umusifuzi Uwikunda Samuel yemeza ko ari Penaliti.

Mu gihe bimenyerewe ko Caleb ariwe utera penaliti za Rayon Sports, iyi yo yahawe Yannick Mukunzi nk’impano yo kumusezera nkuko byemejwe na kapiteni Manzi Thierry nyuma y’umukino, nawe ayinjiza neza, atsindira Rayon Sports igitego cya kabiri kuva yayisinyira muri Kanama 2017.

Uyu mukino warangiye ikipe ya Robertinho itsinze iya Yves Rwasamanzi 2-0 watumye Rayon Sports iguma ku mwanya wa kabiri n’amanota 31 irushwa na APR FC iyoboye urutonde inota rimwe ariko yo ifite imikino ibiri y’ibirarane irimo n’uwo izakinamo na Police FC kuri iki Cyumweru tariki 20 Mutarama 2019.

Imikino yose y’umunsi wa 15 wa shampiyona

Ku wa Gatanu

 Kiyovu Sports 2-1 Musanze FC

Ku wa Gatandatu

 AS Muhanga 1-2 Espoir FC
 Marines FC 0-2 Rayon Sports FC
 AS Kigali 1-0 Amagaju FC

Ku Cyumweru

 Kirehe FC vs Bugesera FC (i Kirehe)
 APR FC vs Police FC (Stade de Kigali)
 Etincelles FC vs Sunrise FC (Stade Umuganda)