Ikipe ya Chelsea, yareze umusifuzi Mark Clattenburg wasifuye umukino yakinnye na Manchester United imushinja gukoresha ’imvugo idakwiye’ ku bakinnyi bayo babiri muri uyu mukino yaje no gutsindwa.

Ikirego kimwe ni uko Chelsea ivuga ko Clattenburg yakoresheje imvugo ivangura, nk’uko amakuru dukesha BBC abivuga.

Iki kirego kirimo umukinnyi wa Chelsea ukina hagati John Obi Mikel ari na we bivugwa ko yaba yarakoreweho aya makosa ubwo umusifuzi yamusifuraga Mikel ntabyakire neza ntavugane neza n’umusifuzi.

Umuvugizi wa Chelsea yabwiye BBC ati "Twagejeje ikirego ku ntumwa ya Premier League yari mu mukino," aha akaba avuga intumwa ya shampiyona y’u Bwongereza yari muri uyu mukino.
Iyi ntumwa ni yo izageza ikirego ku ishyirahamwe ry’umupira w’amaguru mu Bwongereza.

Ishyirahamwe ry’abasifuzi b’umwuga muri iki gihugu na ryo rikaba ritangaza ko iby’iki kirego ryabimenye, abarigize bakaba batangaza ko ikirego kiziganwa ubushishozi.

Ikinyamakuru The Sun na cyo cyanditse kuri iyi nkuru kivuga ko imisifurire itagenze neza, by’umwihariko ku gusohorwa mu kibuga kwa Fernando Torres.

The Sun kivuga ko bitari ikosa, kikibaza impamvu umusifuzi wo hagati atakoresheje itumanaho na bagenzi be bo ku mpande mbere yo gufata icyemezo.

Mu Bwongereza abasifuzi bane basifura umukino baba bafite uburyo bw’itumanaho buhagije, ku buryo buri wese aba abasha kumva ibyo mugenzi avuze.

Ku ruhande rwa Manchester ariko bavuga ko nta kibazo cyabaye mu misifurire, kuko uwa Manchester nyuma yabwiye Torres ko imikinire ye yagaragazaga ko akwiye kuvanwa mu kibuga.

Uyu mukino utavugwaho rumwe, abakinnyi ba Chelsea Branislav Ivanovic na Fernando Torres bahawe amakarita y’umutuku bava mu kibuga; Ivanovic kubera ko yagushije umukinnyi wa Manchester ari we wenyine [dernier defenseur] bari kumwe na Torres kuko yigushije.

Igitego cyahesheje Manchester insinzi ntikivugwaho rumwe

Ikindi kitavuzweho rumwe ni igitego cyahaye insinzi Manchester United, abakurikirana iby’imisifurire bakaba bemeza ko cyatsinzwe n’umukinnyi wari wararirirye (wari muri Off side).

Ibi ni na byo umutoza wa Chelsea Roberto Di Mateo yashingiyeho atangaza, ati "Biteye ikimwaro kubona umukino nk’uyu abayobozi bawufatira ibyemezo mu buryo nk’ubu. Ndahamya ko umusifuzi nawureba azabona ko yakoze amakosa akabije."

Umukino wa shampiyona y’u Bwongereza wahuje Chelsea na Manchester United ku wa 28 Ukwakira wari utegerejwe na benshi, ahanini kuko Chelsea yari itaratsindwa kuva shampiyona yatangira kandi na none Manchester ikaba iyiri inyuma iharanira kuzatwara igikombe nyuma y’uko ibuze icy’umwaka ushize.

Umukino warangiye Manchester itsinze ibitego bitatu kuri bibiri, ubu Chelsea ikaba ikiri iya mbere n’amanota 22 ariko Manchester United ikaba iyirya isataburenge n’amanota 21.

Amwe mu mafoto yafashwe mumukino

Torres yavanywe mu kibuga umutoza yasabye kumusimbuza

Abakinnyi Mikel na Ramires ba Chelsea hamwe n'umusifuzi hari igihe cyageze ntibumva ibintu kimwe