Nyuma y’aho Hamisi Sogonya bakunze kwita Cish utoza ikipe ya Espoir FC y’i Rusizi aherewe inshingano n’ubuyobozi bwayo ko agomba kuyizana mu makipe umunani ya mbere, ubu yasabwe bidasubirwaho gukora uko ashoboye iyi kipe ntizamanuke mu kiciro cya kabiri.

Hamisi Sogonya ibi yasabwe byuko iyi kipe itamanuka mu cyiciro cya kabiri akaba yarabisabwe muri iki cyumweru n’ubuyobozi bukuru bw’ikipe ya Espoir.
Hamisi abajijwe impamvu ubuyobozi bwahinduye icyemezo bwari bwarafashe mbere bw’uko agomba kuyizana mu makipe umunani ya mbere muri Shampiona y’u Rwanda, yavuze ko impamvu ubuyobozi bwahinduye gahunda ari kubera ikibazo ikipe ya Espoir ifite gikomeye cyo kubura ba rutahizamu bakomeye kandi bazi icyo gukora.

Yakomeje avuga ati “nta kintu kibabaza ku mutoza nko kugira rutahizamu umwe, kuko iyo yaramutse nabi cyangwa akagira imvune ibintu bihinduka. Ni na yo mpamvu ubuyobozi bw’i kipe ntoza bwampaye izindi nshingano z’uko ngomba gukora uko nshoboye kose iyi kipe mbereye umutoza ntizamanuke mu kiciro cya kabiri.»

Abajijwe niba ibi byo azabishobora yavuze ko asigaje gutsinda imikino ibiri kugira ngo yizere ko ikipe ya Espoir itazamanuka mu kiciro cya kabiri.