Kuwa gatandatu

Isonga 0-2 Rayon Sport (Stade Regional)
Etincelles 1-0 Mukura (Stade Umuganda)
Espoir FC 1-0 La Jeunesse (Rusizi)

Ku cyumweru

Kiyovu vs APR FC (Stade Regional)
Muhanga F C vs Police FC (Kicukiro)
Musanze F C vs Marine Fc (Musanze)

Shampiyona y’icyiciro cya mbere mu mupira w’amaguru yakomeje kuri uyu wa Gatandatu tariki ya 8 Ukuboza 2012 hakinwa imikino ibanza y’umunsi wa 9; umukino wari utegerejwe na benshi Rayon sports yatsinze Isonga FC 2 ku busa.

Umutoza w’ikipe ya Rayon Sport Didier Gomez yatangaje ko yishimiye uburyo umukino wagenze; ko ibyo bakoze mu myitozo babyubahirije; ati “ibyo twitoje byose byakurikijwe kandi byatugiriye akamaro; gusa kuwa mbere tugomga guhita dukomeza imyitozo kuko turacyafite byinshi byo gukora kandi bikomeye”.

Gomez abajijwe kuri Makenzi yasobanuye ko kuba yagiyemo asimbuye nta kibazo cyarimo gikomeye; kandi ko nta mukinnyi n’umwe uri hejuru ya Rayon Sports ko abakinnyi bayo bose bafite ubushobozi bwo gukina niyo hari abatabonetse.

Umutoza w’ Isonga FC Mashami Vincent yatangarije ikinyamakuru Izuba Rirashe ko batsinzwe nk’abagabo; ati “twakinnye neza nubwo hari udukosa twagiye tuba; ariko twatsinzwe nk’abagabo; ndetse n’igitego cya mbere rwose hashobora kuba harimo kurarira gusa n’icyemezo cy’umusifuzi nta kundi”.

Umukino wa Rayon sport n’Isonga FC wabereye kuri Stade Regional i Nyamirambo; uyu mukino warangiye ku bitego bibiri bya Rayon byatsinzwe na Faustin Usengimana na Kanombe.

Mu yindi mikino Etincelles yatsinze Mukura igitego 1 ku busa; Espoir Fc itsinda la Jeunesse 1 ku busa.

Indi mikino irakomeza kuri iki cyumweru tariki ya 9 Ukuboza 2012 ahategerejwe umukino ukomeye hagati ya APR FC na Kiyovu Sport mu gihe umukino w’ Amagaju Fc na AS Kigali wimuriwe 12 Ukuboza 2012 i Nyamagabe.